Aðeins konum sagt upp hjá Jarðborunum

Sjö starfsmönnum fyrirtækisins Jarðboranir var sagt upp í dag. Samkvæmt heimildum Vísis náðu uppsagnirnar aðeins til kvenna sem störfuðu á skrifstofu fyrirtækisins.

Uppsagnirnar eru liður í endurskipulagningu fyrirtækisins. Í janúar á þessu ári seldi Íslandsbanki 82 prósent hlut sinn í fyrirtækinu. Kaupandinn var samlagsfélagið SF III. Stefnir rekur félagið en eigendur þess eru Gildi lífeyrissjóður, Festa lífeyrissjóður og Lífeyrissjóður starfsmanna ríkisins, Stefnir og Samherji hf.

Heimildir Vísis herma að uppsagninar hafi komið starfsmönnum fyrirtækisins á óvart. Jafnframt hafi verið um ræða sjö launahæstu konur fyrirtækisins.

Starfsmenn Jarðboranna, sem Vísir hefur rætt við í dag, hafa allir með tölu vísað í Baldvin Þorsteinsson, forstjóra fyrirtækisins. Hann hefur hins vegar ekki svarað fyrirspurnum Vísis.

Jarðboranir sérhæfa sig í öflun jarðhita og hefur fyrirtækið annast framkvæmdir á alþjóðlegum vettvangi. Starfsemi þess felst einkum í nýtingu auðlinda í jörð og gerð mannvirkja.