Opið bréf til þingmanna

Ágæti þingmaður.

Mig langar að deila með þér einkennilegri reynslu minni af því að vera erlendur fjárfestir á Íslandi.

Nú í sumar hófum við viðskipti á Íslandi þegar RAC Scandinavia gekk frá kaupum á bílaleigunum Avis og Budget á Íslandi (Alp hf.). Vegna hins óvenjulega ástands í efnahagsmálum á Íslandi, sérstaklega vegna gjaldeyrishafta krónunnar, voru efasemdaraddir um að íslensk fyrirtæki væru góður fjárfestingarkostur.

En þar sem atvinnustefna stjórnvalda var að leggja mikla áherslu á ferðaþjónustuna þóttu forsendur hagstæðar. Verkefni stjórnvalda eins og Inspired by Iceland gaf tilefni til að trúa því að mikil alvara væri á bak við stefnuna. Því var ákveðið að tryggja 45% hlut í næststærsta bílaleigufyrirtæki Íslands og var fjárfestingin bundin til 5 ára skv. lögum um gjaldeyrisútboð.

Félagið sem ég hef unnið hjá frá því ég var tvítugur, RAC Holding, á og rekur bílaleigurnar Avis og Budget í Noregi, Svíþjóð og í Danmörku. Það er því ekki síst vegna reynslu minnar í Skandinavíu sem ég varð undrandi á þeim fyrirvaralausu breytingum sem stjórnvöld boða nú fyrir rekstrarumhverfið sem fyrirtækið mitt á Íslandi starfar í.

Hér er ég að vísa í hækkun á vörugjöldum á bílaleigur sem ný fjárlög gera ráð fyrir, sem eykur álögur gríðarlega á bílaleigugreinina. Ekki síst kom þetta mér á óvart þar sem í gildi er ferðamálaáætlun stjórnvalda til ársins 2015 þar sem meginmarkmið eru að:

a) tryggja samkeppnishæfni greinarinnar.

b) að rekstrarskilyrði hennar geti orðið með sambærilegum hætti og í samkeppnislöndum.

Ég get fullvissað ykkur um að í samkeppnislöndum Íslands, í Skandinavíu, tíðkast ekki að stjórnvöld reki slíkan fleyg í eina atvinnugrein með svo dramatískum hætti og með jafn skömmum fyrirvara og boðað er. Þar styðja stjórnvöld sérstaklega við ferðaþjónustu vegna þess að litið er á hana sem útflutningsgrein sem aflar tekna fyrir samfélagið.

Á bílaleigumarkaði ríkir mjög virk samkeppni og því munu viðbrögð greinarinnar óhjákvæmilega valda því að tekjur vegna vörugjalda verða lægri en fjárlagafrumvarpið gerir ráð fyrir. Afleiðing hærri vörugjalda verður einfaldlega sú að bílaleigur munu geta keypt færri bíla. Dýrari fjárfestingar munu líka kalla á verðhækkanir, sem geta dregið úr eftirspurn og geta haft áhrif á straum ferðamanna til Íslands. Þá neyðast bílaleigurnar til að skoða að taka upp kílómetragjald, sem mun takmarka akstur til að lengja líftíma bílanna. Það mun aftur á móti valda því að dreifing ferðamanna um Ísland minnkar og einskorða þá enn frekar við höfuðborgarsvæðið.

Það er því ekki að ástæðulausu sem ég óska þess að þú sem þingmaður á Íslandi hugleiðir þessar staðreyndir áður en kosið er um ný fjárlög og í raun, nýja stefnu landsins í garð erlendra fjárfesta.