"Ég hef gaman af því að reyna nýja hluti"

Athafnamaðurinn Einar Bárðarson hefur ákveðið að sækjast eftir starfi bæjarstjóra í Garði. Einar er stórhuga um framtíð bæjarfélagsins og vill ólmur fá að leggja sitt af mörkum.

„Ég hef alltaf haft gaman af því að söðla um og reyna nýja hluti," segir Einar. „Ég er að leita mér að starfi þar sem ég get ögrað sjálfum mér og nýtt menntun mína."

Einar lauk nýlega námi sínu við Háskólann í Reykjavík en þar lærði hann viðskipti og stjórnun. Þá seldi hann útvarpsstöðina Kanann til SkjásEins um áramótin.

Alls sóttu 30 manns um stöðu bæjarstjóra í Garðinum, þar á meðal er Samúel Örn Erlingsson, fyrrverandi íþróttafréttamaður.

„Það á eftir að vera mikið verk að velja á milli þessarar einstaklinga, enda er mikið af hæfu fólki sem sækist eftir starfinu," segir Einar.

Mikil óánægja hefur verið með stjórnmál bæjarins síðan meirihlutinn sprakk í síðasta mánuði. Einar óttast þó ekki að takast á við þau verkefni sem fylgja starfinu.

Þá þekkir Einar vel til í Garði en eiginkona hans er ættuð þaðan. „Ég hef heimsótt Garð reglulega og hef verið á Sólseturshátíðunum,“ segir Einar að lokum.