Meira en 1.300 á biðlistum eftir félagslegum íbúðum

Meira en 1.300 manns eru á biðlistum eftir íbúðum innan félagslegra kerfa stærstu sveitarfélaga landsins. Algengasti biðtími eftir íbúðum er á bilinu eitt til tvö ár og eru hlutfallslega flestir á biðlista hjá Kópavogsbæ miðað við fjölda íbúða í boði.

Ragnar Snorri Magnússon, hjá velferðarsviði Kópavogs, segir ljóst að fleiri íbúðarúrræða sé þörf.

„Það er alltaf verið að ræða um að kaupa fleiri, en ekkert hefur verið ákveðið," segir Ragnar. „En það er nokkuð ljóst að það þarf fleiri íbúðir." Fréttablaðið ræddi við forsvarsmenn húsnæðissviða stærstu bæjarfélaga landsins og sammæltust allir um að fleiri leiguíbúðir vanti á markað. Síaukin eftirspurn eftir húsnæði sé ekki í samræmi við það sem í boði er.

Reykjavíkurborg hefur um 1.800 íbúðir í boði og er hlutfallið það hæsta á landinu miðað við íbúatölu bæjarfélaga. Biðtími hefur þó lengst á milli ára, miðað við óútgefna ársskýrslu borgarinnar, eins og sjá má í meðfylgjandi töflu.

Björk Vilhelmsdóttir, formaður velferðarráðs Reykjavíkur, segir að nauðsynlegt sé að fjölga leiguíbúðum, en horfir einnig á frekari framtíðarlausnir eins og húsnæðisbótakerfið.

„Ég vona að þessar bætur verði að veruleika í upphafi næsta árs," segir hún. „Það þarf aðra þróun heldur en að sveitarfélögin fari að kaupa meira húsnæði. Það er okkar framtíðarsýn, að fólk hafi val og finni sér sitt eigið leiguhúsnæði."

Björk vill forðast frekari flokkun húsnæðisúrræða þar sem því fylgi sú hætta að til verði frekari samþjöppun félagslegra vandamála.

„Við munum fjölga leiguíbúðum í borginni svo fólk þurfi ekki að leita inn í félagslega kerfið sem slíkt," segir hún. „Heldur á það að finna sér húsnæði við hæfi og fá svo stuðning í samræmi við það í formi bóta." - sv / sjá síðu 12