Óhræddur við stjörnur Vesturports

„Ég hef akkurat verið að vísa fólki á sýningu Vesturports því það er eiginlega að verða uppselt á allar sýningar hjá okkur," segir Kári Viðarsson, forsvarsmaður nýjasta atvinnuleikhússins á Íslandi, Frystiklefinn á Rifi. Leikhúsið ætlar að setja á svið sýningu sína um sjálfan Axlar-Björn, Góðir hálsar, sem sýnd var við góðar undirtektir í ágúst í fyrra. Hún var þá sýnd í takmarkaðan tíma þar sem leikararnir þurftu frá að hverfa vegna anna á öðrum vettvangi.

Svo skemmtilega vill til að í Borgarleikhúsinu verður einnig frumsýnt verk um Axlar-Björn í þessari viku, í leikstjórn Björns Hlyns Haraldssonar með tónlist eftir Kjartan Sveinsson úr Sigur Rós með þeim Helga Björnssyni og Atla Rafni Sigurðarsyni í aðalhlutverkum. Sumsé stórstjörnu sýning. Kári er hins vegar hvergi banginn, segist bara svellkaldur. „Ég hlakka bara til að sjá hina sýninguna og eftir því sem ég hef heyrt þá eru þær gjörólíkar," segir Kári en áhorfendur á Rifi mega eiga von á öllu í sýningunni, bæði blóði og kareókí.

Kári, sem er uppalinn á Hellissandi, segist ekki vita af hverju það sé allt í einu svona mikill áhugi á Axlar-Birni. Hann hafi sjálfur alist upp með þessari sögu og nánast drukkið hana með móðurmjólkinni. „Þetta er rosalega flott saga sem er gaman að tækla," segir Kári sem leikur sjálfur Axlar-Björn. -fgg