1.500 hótelherbergi duga í fjögur til níu ár

Á teikniborðinu eru áform um að fjölga hótelherbergjum í Reykjavík um rúmlega 1.500. Þau eru mislangt á veg komin og eru fjarri því nægjanlega mörg til að anna þeirri eftirspurn sem aukinn ferðamannastraumur skapar. Í drögum að greinargerð sem VSÓ Ráðgjöf vann fyrir Reykjavíkurborg um þörf á gistirými í höfuðborginni á árunum 2012 til 2030 segir að líklega þurfi að byggja um 180 til 380 ný hótelherbergi á ári á tímabilinu. Þau áform sem eru á teikniborðinu myndu einungis duga til að anna þeirri eftirspurn í fjögur til níu ár. Langflest áform um uppbyggingu eru í miðborg Reykjavíkur. Við vinnslu greinargerðarinnar aflaði VSÓ Ráðgjöf upplýsinga um áform um fyrirhugaða gististaði í Reykjavík. Upplýsingaöflunin var bundin við þau verkefni sem teljast tiltölulega stórir gististaðir. Samkvæmt þeim upplýsingum sem safnað var saman eru alls tólf stórir gististaðir á teikniborðinu í höfuðborginni. Þeir eru mislangt komnir og tekið er fram í greinargerðinni að óvissa sé um framvindu sumra verkefnanna. Samanlagt eiga þessir stóru gististaðir að fjölga herbergjum um 1.536 talsins. Þar munar mestu um fyrirhugað 343 herbergja hótel í Borgartúni, sem er nú í skipulagi, og 250 herbergja hótel sem mun mögulega rísa við hlið Hörpunnar við Reykjavíkurhöfn. Í greinargerðinni segir að "áform um nýja gististaði koma til með að breytast m.a. í takti við efnahag, fjölda ferðamanna og afkomu í ferðaþjónustu og rekstri gististaða. Ef litið er til fjölgunar ferðamanna sem koma til Íslands er ljóst að eftirspurn eftir gistirýmum mun aukast“. Þar segir einnig að verði árleg fjölgun ferðamanna á bilinu fimm til sjö prósent fram til ársins 2030, og miðað sé við sömu og betri nýtingu gistirýma en er í dag, þá þurfi að fjölga hótelherbergjum um 180 til 380 á hverju ári. Miðað við það þarf að fjölga gistirýmum um 3.600 til 7.500 á tímabilinu. Frá árinu 1990 hefur vöxturinn verið 6,3 prósent árlega að jafnaði. Ef miðað er við þau áform sem eru í gangi er ljóst að áhugi á uppbyggingu gististaða beinist aðallega að miðborginni, eins og sjá má hér til hliðar. thordur@frettabladid.is