Enn leitað að lottó-milljónamæringnum

Einstaklingurinn sem vann 73 milljónir í lottó fyrir tæpum tveimur vikum er enn ekki fundinn. Milljónirnar liggja því enn óhreyfðar.

Þó að vinningshafar vitji vinninga sinna venjulega innan þriggja daga frá úrslitum hafa starfsmenn Íslenskrar getspár enn ekki gefið upp vonina. Þeir telja ýmsar skýringar geta verið á því að vinningshafinn hefur ekki skotið upp kollinum. Hann gæti verið erlendis eða átt eftir að skoða miðann sinn.

Lottóvinningar fyrnast á einu ári. Eftir það renna þeir til Öryrkjabandalagsins, Ungmennafélags Íslands og Íþrótta- og Ólympíusambandsins. Milljónirnar munu því bíða eiganda síns í tæpt ár í viðbót og renna svo til góðgerðarmála.