Nike „skýtur“ íslenska snjóbrettakappa á Akureyri

Upptökulið frá Nike er nú statt á Akureyri við upptökur, en brettakapparnir Halldór og Eiríkur Helgasynir eru hér á landi í stuttri heimsókn og tökuliðið fylgdi þeim eftir.

Það hefur snjóað í Hlíðafjalli og strákarnir Halldór Helgason, Eiríkur Helgason og Guðlaugur Hólm Guðmundsson notuðu tækifærið til að renna sér í íslenskum hlíðum. Að þessu sinni eru tveir erlendir brettakappar með í för og upptökulið fylgir þeim. Auk þess fylgir sérstakt upptökulið Halldóri og félögum alla jafna. Það er því fjölmenni þessa dagana í hlíðunum við Akureyri.

„Það var í raun bara heppni að þeir fengu að koma. Strákarnir vilja vera hérna eins mikið og þeir geta en svo ræður Nike hvar þeir eru hverju sinni," segir Hilmar Þór Sigurjónsson, félagi strákanna.

„Mér skilst að þessi myndbönd komi í snjóbrettamynd sem Nike er að framleiða," segir Hilmar. Hér að ofan má sjá strákana eftir eina salíbunu niður hlíðarnar.