Stjórn Eirar verður leyst upp og ný stjórn skipuð

Fulltrúaráð hjúkrunarheimilisins Eirar verður leyst upp og ný stjórn skipuð á allra næstu dögum. Nauðsynlegt til að skapa trúverðugleika, segir einn þeirra sem hefur unnið að lausn á fjárhagsvanda heimilisins.

Þrír hafa þegar sagt sig úr stjórn Eirar, fyrstur þeirra stjórnarformaðurinn Vilhjálmur Þ. Vilhjálmsson. Starfshópur sem unnið hefur að lausn á fjárhagsstöðu Eirar hefur komist að þeirri sameiginlegu niðurstöðu að farsælast sé að víkja fulltrúaráðinu en núverandi stjórn situr í umboði þess.

Fulltrúi fjárlaganefndar í hópnum segir þetta nauðsynlegt til að skapa trúverðugleika.

„Mér er kunnugt um að það er verið að vinna að þessum málum og stendur yfir að skipta um flesta ef ekki alla fulltrúa þarna," segir Björn Valur Gíslason, fulltrúi fjárlaganefndar í starfshópnum. Hann segist ekki vita hverjir eiga að koma í staðinn í fulltrúaráðið.

Það blasir þá við að stjórnin verði rekin, ekki satt?

„það blasir auðvitað við að nýtt fulltrúaráð mun skipa nýja stjórn og það má svosem túlka það þannig að ef það á að skipa nýtt fulltrúaráð að þar með sé núverandi stjórn svipt umboði sínu," svarar Björn Valur.

Ljóst er að ekki er nóg að skipa nýja stjórn, Eir þarf nýtt fjármagn. Björn Valur segir ekki standa til að ríkið leggi fé inn í reksturinn. Hann segist þó ekki getað útilokað það.

„Það er ekkert útilokað í þessu lífi og ef það fer nú þannig að það finnist engin lausn á þessum málum ásættanleg þá þurfum við auðvitað að grípa til einhverra aðgerða, þá fyrst og fremst til að vernda hagsmuni ríkisins," segir Björn Valur.

En Íbúðalánasjóður, einn kröfuhafa í Eir, er í eigu ríkisins. Björn Valur vonast þó til að aðrir komi inn með fé.

Hverjir gætu það verið? „Ég hef ekki hugmynd um það, en einhverjir eru nú í þessum bransa, ekki satt?" segir Björn Valur að lokum.