"Saksóknari hefur horft á spilaborg sína hrynja fyrir framan sig"

Börkur Birgisson lýsti yfir sakleysi sínu þegar hann ávarpaði fjölskipaðan Héraðsdóm Reykjaness í dag. Aðalmeðferð í máli ákæruvaldsins gegn honum og Annþóri Karlssyni og átta öðrum er nú lokið en þeir eru sakaðir um að hafa skipulagt stórfellda líkamsárás í janúar á þessu ári.

Við upphaf aðalmeðferðar í dag kröfðust Börkur og Annþór að fá að ávarpa dóminn. Ávarp hans batt endahnút á aðalmeðferðina. Sækjandi hefur farið fram á sjö ára fangelsisdóm yfir Berki en átta yfir Annþóri.

Börkur vék sérstaklega að atburðarásinni sem átti sér stað í Háholti í Mosfellsbæ þann 4, janúar síðastliðinn.

„Mér er gefið að sök að hafa lamið brotaþola með kylfu. Ég vil vekja athygli á því að ég hafði ekki hugmynd um að brotaþoli yrði á staðnum. Ég var aldrei í árásarhugleiðingum. Ég vil ítreka það," sagði Börkur.

Börkur tók í sama streng og Annþór og gagnrýndi rannsókn lögreglu á málinu.

„Lögreglan falsaði skýrslu vitna og sakborninga, ásamt því að kúga veikgeðja einstaklinga til að bera ljúgvitni gegn mér."

Þá sagðist Börkur vera með afrit af skýrslutökum lögreglunnar og hótaði að birta upptökurnar á veraldarvefnum.

„Nánast allir þeir sem hafa borið mig röngum sökum hafa dregið framburð sinn til baka, ég fagna því," sagði Börkur og bætti við: „Saksóknari hefur horft á spilaborg sína hrynja fyrir framan sig."

Börkur vék síðan að frávísunarkröfu verjanda Annþórs. Í gær benti Guðmundur St. Ragnarsson á að Karl Ingi Vilbergsson, aðstoðarsaksóknari, hefði lent í ryskingum við Smára Valgeirsson, sakborning, í júní á þessu ári. Þá var réttað yfir Berki vegna brota gegn valdstjórninni. Smári reyndi að koma úlpu til Barkar er hann var leiddur í dómssal.

„Ég vil taka fram að Karl Ingi Vilbergsson réðst á vin minn í héraðsdómi í júní síðastliðnum. Ég var vitni að því."

Börkur lauk máli sínu á þessa leið: „Ég vil að lokum benda á að ég hef setið saklaus í fangelsi í átta mánuði út af þessu máli."