Einstakt uppboð fyrir Ingó

Landsmönnum gefst einstakt tækifæri næsta sunnudagskvöld þegar margir af færustu ljósmyndurum landsins bjóða upp myndir sínar til styrktar Ingólfi Júlíussyni sem greindist með hvítblæði fyrir skömmu.

Ingólfur greindist með bráðahvítblæði í byrjun október á þessu ári og hefur verið á sjúkrahúsi síðan. Upp úr áramótum fer hann svo til Svíþjóðar þar sem hann mun gangast undir mergsskipti.

Samhugur félaga hans í stétt ljósmyndara varð til þess að þeir tóku höndum saman og ákváðu að aðstoða þennan hjartahreina og hlýja mann sem Ingólfur er. Það gera þeir til dæmis með þessu veglegasta ljósmyndauppboði Íslandssögunnar og styðja þannig fjárhagslega við bakið á honum og fjölskyldu hans á þessum erfiðu tímum.

Á uppboðinu verður einnig að finna málverk eftir Tolla, sem hann gaf sjálfur til söfnunarinnar, og myndavél sem 12 helstu ljósmyndarar landsins hafa tekið myndir á og áritað, en filman fylgir vélinni, óframkölluð, og því um einstakan grip að ræða.

Margir helstu ljósmyndarar og blaðaljósmyndarar landsins gefa myndir á uppboðið. Þar á meðal eru þeir Ragnar Axelsson (RAX), Gunnar Valberg Andrésson (GVA) Gassi, Spessi og Ari Magg. Sjálfur hefur Ingó, eins og hann er að jafnaði kallaður, starfað sem ljósmyndari um árabil, en hann hefur tekið myndir fyrir helstu fjölmiðla á Íslandi auk þess sem hann tekur myndir fyrir Reuters.

Uppboðið fer fram í Gyllta sal Hótel Borgar næstkomandi sunnudagskvöld og hefst klukkan 19:00.

Hægt er að skoða myndirnar hér.