Fatahönnuðir fengu styrki

Hálfíslenska hönnunarteymið Ostwald Helgason var á meðal þeirra sem fengu úhlutað styrk úr Hönnunarsjóði Auroru í dag. Föt þeirra hafa vakið töluverða athygli í Bandaríkjunum þar sem þau hafa ratað á síður tískublaðanna. Þau verða brátt fáanleg í yfir tuttugu löndum.

Alls fengu sex hönnuðir og hönnunarteymi í dag úthlutað samtals sex og hálfri milljón í styrki úr Hönnunarsjóði Auroru. Sjóðurinn hefur síðan árið 2009 styrkt íslenska hönnuði og arkitekta til að koma sér á framfæri bæði hér á landi og erlendis. Peningarnir koma úr Auroru velgerðarsjóði sem Ólafur Ólafsson hjá Samskipum stofnaði.

Sá sem fékk hæstan styrk úr Hönnunarsjóði Auroru í dag eða eina og hálfa milljón er fatahönnunarteymið Ostwald Helgason. Það saman stendur af Ingvari Helgasyni og Susanne Ostwald. Hönnun þeirra hefur vakið töluverða athygli erlendis en þau hafa haldið tvær sýningar í New York í ár. Þá hefur verið fjallað um fötin þeirra í helstu tískublöðum um allan heim.

„Þetta hefur gengið alveg vonum framar. Við sýndum í fyrsta skipti í febrúar og þetta er bara svona hlutir sem maður heldur alltaf að gerist fyrir annað fólk en ekki mann sjálfan en einhvern veginn hefur þetta komið saman og þetta gengur alveg rosalega vel," sagði Ingvar Helgason.

Föt þeirra eru nú fáanleg víða um heim svo sem í Bandaríkjunum, Japan, Bretlandi, Rússlandi, Dubai og Indónesíu.

„Frá og með í febrúar þá er þetta komið í held ég tuttugu, tuttugu og tvö lönd þannig að við erum mjög ánægð," sagði Ingvar.