Segir stöðugt ráðist á RÚV úr Hádegismóum

„Stöðug gagnrýni Morgunblaðsins á fréttastofu RÚV snýst oftar enn ekki um einstaka starfsmann fréttastofunnar með það að marki að gera lítið úr vinnu hans."

„Ráðist er á þá í leiðurum, staksteinum og Reykjavíkurbréfum svo ekki sé minnst á beinar árásir á fréttastjórann. Heilbrigð blaðamennska er hafin yfir gagnrýni af þessu tagi," segir Jóhanna Vigdís Hjaltadóttir, einn reyndasti fréttamaður Sjónvarpsins í forsíðuviðtali í Nýju lífi sem kom í verslanir í dag.

Í viðtalinu, sem er tekið af Örnu Schram, ræðir hún um ferilinn og þá gagnrýni sem hún hefur fengið á sig á tæplega tuttugu ára ferli í fréttum.

„...það má ekki gleyma því að gagnrýni getur verið uppbyggileg. Þessi er það alls ekki. Rök skipta ekki máli og gefið er veiðileyfi á allt sem frá fréttastofunni kemur."

„Af hverju telurðu að Morgunblaðið geri lítið úr vinnu einstakra starfsmanna RÚV?" spyr Arna.

„Það er góð spurning og mætti velta því fyrir sér hvers vegna fréttastofa RÚV er svo að segja skotmark Moggans," svarar Jóhanna Vigdís.

Jóhanna hefur verið uppnefnd „íhaldsfrúin" og sautjándi þingmaður Sjálfstæðisflokksins, að því er segir í viðtalinu. „Einnig hef ég þótt hampa þessari ríkisstjórn of mikið. Er ekki bara ágætt að setja þetta í blandarann?" segir Jóhanna í viðtalinu.