Ók á mann og lamdi hann svo í klessu

Karlmaður var dæmdur í sex mánaða skilorðsbundið fangelsi í Hæstarétti í dag fyrir að hafa ekið aftan á mann í umferðinni og í kjölfarið ráðist á hann með ofsafengnum hætti.

Atvikin áttu sér stað í umferðinni á háannatíma þegar „bíll var við bíl" á Reykjanesbrautinni. Ofbeldismaðurinn ók aftan á brotaþolann og átti þannig sjálfur sök á árekstrinum. En hann lét ekki þar við sitja heldur vatt sér út úr bifreið sinni, gekk að bíl brotaþolans og lét hnefahögg og spörk dynja á honum. Að svo búnu ók hann á brott.

Af þessum viðskiptum hlaut brotaþolinn mar og eymsli víðsvegar um líkaman auk þess sem hann rifbrotnaði. Dóttir hans var með honum í bílnum og varð vitni að árásinni.

Ákærði neitaði sök í málinu. Hann hélt því fram að hann hefði ekki ráðist á brotaþolann „heldur sett hann inn í bifreiðina, svo þarna yrði ekki hættuástand, eftir að ákærði hafði gert sér grein fyrir því að þarna væri ekki hægt að ræða málin af neinni skynsemi."

„Er ekkert fram komið í málinu sem gaf ákærða tilefni til þessarar ofsafengnu árásar. Þá hefur hann ekki sýnt merki iðrunar vegna verknaðarins, heldur þvert á móti réttlætt gerðir sínar. Ákærði á sér engar málsbætur," segir í dómi Hæstaréttar.