"Það eru allir boðnir og búnir að taka höndum saman"

„Það gefur auga leið að þegar bústofninn er í hættu þá er þungt yfir mönnum. Svona hefur ekki átt sér stað í mörg mörg ár," segir Svavar Pálsson, sýslumaður á Húsavík, sem hefur fundað með viðbragðsaðilum fyrir norðan í allt kvöld.

Almannavarnadeild ríkislögreglustjóra lýsti í kvöld yfir neyðarstigi í Þingeyjarsýslu vegna óveðursins sem gekk yfir svæðið í gær. Talið er að hátt í 12 þúsund kindur séu fastar upp á fjöllum.

„Síðustu menn voru að koma í hús sem voru á þessum svæðum. Við erum að fara yfir ástandið og skipuleggja björgunaraðgerðir á morgun, við hefjum leit strax í fyrramálið," segir Svavar í samtali við fréttastofu í kvöld. Reiknað er með að vel á annað hundrað björgunarsveitarmenn taki þátt í aðgerðum á morgun. „Þá hafa bæjarbúar einnig boðið fram hjálp sína, sem og bændur hér á svæðinu. Það eru allir boðnir og búnir að taka höndum saman."

Svavar segir að leitað hafi verið í Mývatnssveit í dag. „En þetta eru fleiri svæði. Það verður farið að Þeistareykjum af fullum þunga á morgun. Þá þarf einnig að halda áfram leit á Reykjaheiði, sem og í Bárðardal. Það eru helst þessir fjórir staðir."

Aðspurður hvort að neyðarstig Almannavarnadeildar ríkislögreglustjóra muni auðvelda björgunarsveitarmönnum störf sín, segir Svavar svo vera. „Þegar svona almannavarnaástand hefur verið virkjað, þá aukast heimildir þeirra sem stjórna aðgerðum. Það verður auðveldara að kalla menn til aðstoðar sem og tæki og tól."

Almannavarnastigin eru þrjú. Fyrsta er óvissustig, því næst kemur hættustig og loks er það neyðarstig. Á heimasíðu Almannavarna segir um neyðarstig: „Neyðarstig einkennist af atburði sem valdið hefur slysum á fólki og/eða tjóni á mannvirkjum. Verkefni á þessu stigi einkennast af tafarlausum aðgerðum til lífsbjargandi aðstoðar og viðleitni til að afstýra fleiri slysum og varna frekara tjóni."

Nánar er hægt að lesa um neyðarstigið hér.