Ætlar að endurgreiða styrkina

„Ég er óskaplega þakklátur og finn fyrir miklum létti. Ég fékk stefnuna á afmælisdaginn minn 23. mars árið 2011 og síðan þá hefur þetta hangið yfir mér eins og þrumuský. En það er nú að stórum hluta farið í burtu," segir bloggarinn Teitur Atlason, sem var í dag sýknaður af meiðyrðakröfu Gunnlaugs M. Sigmundssonar og eiginkonu hans.

Teitur var ekki viðstaddur dómsuppsöguna í Héraðsdómi Reykjavíkur í morgun þar sem hann býr í Svíþjóð. Þegar fréttastofa heyrði í honum hljóðið nú eftir hádegi sagði hann að málið hefði legið þungt á sér síðustu mánuði.

„Ég skammast mín ekkert fyrir að segja það. Ég missti úr svefn og var að drepast úr stressi fyrst eftir að ég fékk stefnuna. Maður fer að velta því fyrir sér ef maður skyldi tapa, að það sé hræðilegt fyrir orðsporið og þannig. En eftir því sem leið á, þá áttaði ég mig á því að það eru til verri hlutir en að tapa meiðyrðamáli," segir hann.

„Mér fannst þetta mál ganga of langt. Þetta fór of langt. Ég bauð fram sættir í málinu, þær fólust í því að ég gæfi ein mánaðarlaun í gott málefni og Gunnlaugur myndi gera það sama. Mér fannst það góð lausn og varð svolítið svekktur að þeirri lausn hafi ekki verið tekið," segir hann.

Málið hefur augljóslega haft mikil áhrif á fjárhaginn en Teitur segir að málskostnaðurinn sem Gunnlaugi er gert að greiða honum, ein og hálf milljón, dugi rétt svo fyrir lögfræðikostnaðinum.

Þegar málið hófst lagði almenningur honum lið og lagði inn á hann pening til að hann gæti haldið uppi vörnum í málinu. Teitur hefur ákveðið að þegar búið verður að gera upp alla reikninga ætlar hann að greiða, öllum þeim styrktu hann, til baka. En hann fékk styrki frá fólki frá 500 krónum upp í 50 þúsund krónur.

„Það verður gaman þegar ég endurgreiði öllum hverja einustu krónu. Það verður skemmtilegasti dagur lífs míns þegar ég hringi í bankann og bið þjónustufulltrúann um að bakfæra allar greiðslurnar," segir hann.

„Það er svo mikilvægt fyrir mig að endurgreiða þessa peninga. Því mig langar að sýna fram á það að með samstöðu er hægt að slá skjaldborg utan um þann sem stendur í ströngu. Máttur samstöðunnar kemur bersýnilega í ljós í þessu mál. Ef ég hefði ekki fengið þennan stuðning á sínum tíma hefði ég farið á hausinn. Ég hefði gefist upp. Þetta hafði afgerandi áhrif á þessi málaferli mín."

Spurður hvort hann óttist það að Gunnlaugur áfrýi dómi héraðsdóms til Hæstaréttar, og gæti komist að annarri niðurstöðu en héraðsdómur, segir hann svo ekki vera. „Ég er ekkert að spá í því, ég hef ekkert með það að gera. Ég hef allan tímann í þessu máli tekið eitt skref í einu. Núna hyllir svo sannarlega undir lok í málinu og það er óskaplega gott. En ef það heldur áfram, þá spýti ég bara í lófana og tek næsta skref," segir Teitur að lokum.