Tekur tíma að fá viðtal hjá Stígamótum

Það getur tekið þó nokkurn tíma að fá viðtöl hjá Sígamótum. Anna Þóra Kristinsdóttir, starfskona Stígamóta, segir að biðin geti farið upp í tvær vikur í sumar vegna álags.

Í sumar verða færri starfsmenn á Stígamótum en venjulega vegna sumarleyfa. Vegna álags getur bið eftir aðstoð þar á bæ orðið nokkuð löng í sumar. Venjulega er þó biðtíminn minni.

Á mánudaginn var birtist grein a vefmiðlinum drusluganga.org þar sem höfundur skrifar um langa bið eftir viðtalstíma hjá Stígamótum. Einnig segir í greininni að nær allur tíminn í viðtalinu hafi farið í að fylla út eyðublöð. Sömuleiðis nefnir höfundur að sökum þess hún fór ekki að skæla í viðtalinu hafi verið talið að hún þyrfti ekki á aðstoð að halda. Reiðin kraumar í höfundi.

„Auðvitað eiga allir rétt á að leita til Stígamóta og allir fá hjálp og þú þarft ekki að fara að gráta," segir Anna. Hún segir sömuleiðis að venjulega fari tíminn ekki allur í skriffinnsku. Yfirleitt er farið yfir ákveðin eyðublöð en það er samt ekki skylda að fylla þau út.

„Það er leiðinlegt að hún hafi upplifað þetta svona," segir Anna og vildi gjarna bjóða henni að koma aftur.

Á síðasta ári leituðu um 300 manns hjálpar til Stígamóta.