Galtómt Alþingi

Þegar þingmenn voru að yfirgefa Alþingi í nótt á leið í sumarfrí mættu rafvirkjar og smiðir til að losa borð og aftengja tölvur til að undirbúa framkvæmdir á Alþingissalnum í sumar.

Það var heldur tómlegt um að litast í sal Alþingis fyrir hádegi í dag. Búið var að fjarlægja alla stóla úr salnum og smiðir, rafvirkjar og burðarmenn höfðu í nægu að snúast við að aftengja og flytja borð þingmanna í burtu .

Um leið og og þingfundi var lokið komu fyrstu menn til að aftengja tæki, þetta gerum við á fjögurra ára fresti því forseti Íslands er settur inn hérna í salnum 1. ágúst. Þá höfum við tækifæri til að gera salnum ýmislegt til góða," Helgi Bernódusson, skrifstofustjóri Alþingis.

Í sumar verður gólfið tekið í gegn og því þarf að flytja öll húsgögn í burtu á meðan. Helgi segir að framkvæmdir hafi frestast aðeins þar sem þinglok voru seinna en gert var ráð fyrir svo menn þurfa að hafa hraðar hendur.

Á ekkert að halda ball svona í millitíðinni? „Nei, en ég er ekki frá því að hér yrði ágætur ballstaður. Það er mjög gott hljóð í salnum og svo hugsa ég að það væri hægt að slá hér upp balli og dansa. Það væri örugglega meiri gleði í því en er í þingsalnum annars.

Alþingissalurinn virðist vera ágætlega stór í sjónvarpinu en í raun er hann einungis rúmur 91 fermetri sem gerir minna en 1 og hálfan fermetra fyrir hvern þingmann sem þar situr. Fyrir innsetningu forseta Íslands þarf að koma miklum fjölda gesta fyrir í salnum auk kórs og hljómsveitar.

„Það er borð hér í salnum fyrir forseta. Hann og kona hans eða karlmaður ef því er að skipta, þá fara þau út á svalir og síðan er hérna svolítil athöfn hér á eftir inni í þinghúsinu.

Margar hendur vinna létt verk og eftir einungis nokkrar klukkustundir var salurinn sem við þekkjum oftast svona, orðinn galtómur, en hann eins og þingmenn fær leyfi frá þingstörfum til 11.september.