Arion banki hafnar tilboði frá Bakkavararbræðrum

Arion banki hefur hafnað tilboði frá Bakkavararbræðrunum Ágústi og Lýði Guðmundssonum, í hlut bankans í Bakkavör.

Eins og greint var frá í fréttum Stöðvar 2 á föstudag hafa Bakkavararbræður að undanförnu nálgast hluthafa í Bakkavör og boðist til þess að kaupa af þeim hlutinn í félaginu. Lífeyrissjóðirnir Gildi og Lífeyrissjóður verzlunarmanna, sem eiga samtals ríflega 12 prósent hlut, hafa báðir gefið það út að þeir ætli ekki að selja bræðrunum hlutinn sinn heldur frekar freista þess að halda á hlutnum og vonast til þess að verðmæti hans aukist með tímanum.

Bakkavör var árið 2010 stærsta fyrirtæki í íslenskri eigu, samkvæmt Frjálsri verslun, en starfsemi félagsins er í Bretlandi. Það framleiðir tilbúna matrétti fyrir verslanir. Velta félagsins í lok árs 2010, nam tæplega 300 milljörðum króna.

Arion banki, sem á stærstan hlut í félaginu, eða 34 prósent, ræður miklu um hvort Bakkavararbræður ná yfirráðum yfir félaginu en hlutur þeirra er í tæplega 26 prósent, en hlutur annarra hluthafa er 74 prósent.

Bakkavararbræður eignuðust sinn hlut í félaginu eftir endurskipulagningu með því að kaupa hann á fjóra milljarða króna, en hluti af þessum kaupum var tæplega 7 prósent hlur Lífeyrissjóðs starfsmanna ríkisins sem bræðurnir keyptu á ríflega einn milljarð. Tilboð bræðranna í hluti annarra hluthafa byggir á sama verðmati og kaup þeirra á fjórðungshlutnum tóku mið af. Miðað við það er virði Bakkavarar 16 milljarðar króna.

Í fréttum Stöðvar 2 sl. föstudag var frá því greint að stjórnarmenn í lífeyrissjóðunum hefðu rætt það á stjórnarfundum, og spurt, hvaðan Bakkavararbræður fái peninga til þess að kaupa félagið.

DV fjallar um þetta í dag, og setur arðgreiðslur til Bakkavararbræðra út úr fjárfestingafélaginu Exista, þar sem þeir voru stærstu hluthafar fyrir hrunið, í þetta samhengi. Í umfjöllun blaðsins kemur fram að Bakkavararbræður hafi fengið 8,7 milljarða króna í arð á árunum 2005 til 2007 vegna afkomu félagsins á undagengnu rekstrarári hvers árs.

Efnahagsreikningur Exista, sem nú er í eigu kröfuhafa og starfar undir nafninu Klakki ehf., var í evrum á þessum tíma. Sé mið tekið af því hvernig gengi krónunnar gagnvart evru hefur þróast frá þeim tíma er arðgreiðslurnar áttu sér stað, þ.e. með gengisfallinu sem fylgdi hruni bankakerfisins, þá er upphæðin nærri 20 milljörðum króna að núvirði.



Uppfært: 19:16. Arion banki hefur hafnað tilboði frá Bakkavararbræðrum, fréttin var uppfærð í samræmi við upplýsingar um það.