Bakkavararbræður vilja eignast Bakkavör

Ágúst og Lýður Guðmundssynir hafa gert lífeyrissjóðum og bönkum tilboð í hlutabréf í Bakkavör með það fyrir augum að eignast félagið að fullu. Þeir hafa þegar keypt hluti í félaginu fyrir fjóra milljarða, meðal annars af Lífeyrissjóði starfsmanna ríkisins. Aðrir hluthafar reyna nú að halda yfirráðum í félaginu.

Undanfarna daga hafa Bakkavararbræðurnir Ágúst og Lýður Guðmundssynir átt fundi með forsvarsmönnum stærstu lífeyrissjóða landsins og boðist til að kaupa hluti þeirra í félaginu. Stjórnir lífeyrissjóðanna hafa ekki viljað taka kauptilboðunum og vonast nú til þess að halda yfirráðum yfir félaginu.

Ágúst og Lýður eiga um 26 prósent hlut í Bakkavör og borguðu um fjóra milljarða fyrir hlutinn. Inn í þessum kaupum var meðal annars hlutur sem áður var í eigu Lífeyrissjóðs starfsmanna ríkisins en Ágúst og Lýður keyptu þann hlut af sjóðnum fyrir ríflega milljarð.

Forsvarsmenn lífeyrissjóðsins hafa neitað að upplýsa um viðskiptin í nákvæmisatriðum, en verðbréfafyrirtæki hafði milligöngu um viðskiptin. Á móti þeim eru síðan aðrir eigendur, þar stærstir Arion banki, með 34 prósent, Gildi lífeyrissjóður og Lífeyrissjóður verzlunarmanna.

Samkvæmt heimildum fréttastofu hafa þessir meirihlutaeigendur í félaginu, með Arion banka í broddi fylkingar, unnið að því að stilla saman strengi sína undanfarna daga. Þessir eigendur vilja halda völdum og koma í veg fyrir að Bakkavararbræður eignist meirihluta í félaginu.

Harpa Jónsdóttir, stjórnarformaður Gildi lífeyrissjóðs, staðfesti við fréttastofu að Ágúst og Lýður hefðu nálgast sjóðinn og lýst yfir áhuga á því að eignast allan hlut sjóðsins. Svör sjóðsins voru hins vegar skýr:

„Við teljum að þeir eigi ekkert að hafa kost á því að hafa ráðandi hluti í félaginu. Það er alveg skýr afstaða hjá okkur," segir Harpa.

Eitt af því sem stjórnarmenn lífeyrissjóðanna hafa spurt sig að er einfaldlega hvaðan koma peningarnir, því mörg félög sem Bakkavararbræðurnir tengdust fóru mjög illa út úr hruninu.

Heildarvirði Bakkavarar samkvæmt því sem Ágúst og Lýður hafa viljað greiða fyrir hlut í félaginu, og boðið lífeyrissjóðunum, er um 16 milljarðar króna. Ágúst er núverandi forstjóri félagsins og Lýður er stjórnarformaður.