Andarungaleikskóli í Borgarfirði

Það var fagur hópur andarunga sem hann Guðbrandur Benediktsson rakst á þegar hann var staddur í Borgarfirðinum í gær. Um var að ræða brandandarunga og taldi Guðbrandur 41 unga í hópnum.

Gunnar Þór Hallgrímsson fuglafræðingur segir það vel þekkt að brandendur slái saman í hópa. „Maður sér oft að það er kominn hópur saman með ungahersingu með sér," segir Gunnar í samtali við Vísi. Hann segist ekki hafa skýringu á því hvers vegna endurnar geri þetta. „Þetta gerist hjá öðrum öndum líka, eins og til dæmis æðarfuglinum. Þá sér maður nokkrar kollur saman og svo kemur ungastrollan á eftir," segir Gunnar. Aðspurður segir Gunnar að það sé vel hægt að sjá þetta fyrir sér sem nokkurskonar andarungaleikskóla.

Þegar Guðbrandur sá endurnar í Borgarfirðinum kom honum i hug meðfylgjandi vísa.

Kann einhver kolluna að toppa

ungarnir á bakkanum skoppa.

Brandönd í næði

nær sér í fæði.

Nærir með því unga kroppa.