Telja Samkeppniseftirlitið helstu ógn Haga

Greiningadeild Arion banki telur að helst ógn Haga sé ekki samkeppni, heldur ákvarðanir Samkeppniseftirlitsins og nýfengnar heimildir eftirlitsins.

Þannig segir í mati greiningadeild Arion banka, sem unnin var eingöngu fyrir fagfjárfesta, og Vísir hefur greint frá, að mat Samkeppniseftirlitsins geti litast af ýmsu, en ekki sé ólíklegt að dreift eignarhald á félaginu rói eftirlitið eitthvað, eins og það er orðað í mati bankans.

Í matinu er bent á að Hagar hafa þurft að punga út rúmlega 600 milljónum króna vegna stjórnvaldssekta síðustu árin. „Að einhverju leyti hefur Samkeppniseftirlitið því andað vel ofan í hálsmálið á félaginu," eins og segir í matinu, sem er ekki ætlað almenningi, heldur aðeins fagfjárfestum.

Þá er greint frá því í matinu að á síðasta ári voru heimildir Samkeppniseftirlitsins auknar, en eftirlitið hefur nú víðtækar heimildir til inngripa í starfsemi fyrirtækja án þess að brot hafi átt sér stað.

Greiningadeild Arion banki lítur því svo á að Hagar starfa í umhverfi sem getur í einhverjum tilfellum verið ófyrirsjáanlegt og háð mati eftirlitsstofnana á hverjum tíma. Til að mynda er aldrei hægt að útiloka að eftirlitið beiti sér fyrir því að tiltekinn rekstur verði brotinn upp í smærri einingar eða seldur út.

greiningadeild Íslandsbanka virðist hafa minni áhyggjur af Samkeppniseftirlitinu, en bendir á að einn stór áhættuþáttur fyrirtækisins sé dómsmál Haga gegn Arion banka vegna ágreinings um útreikningar gengistryggðra lána sem félagið greiddi upp í lok október 2009. Hagar fengu greiddar rúmlega hálfan milljarð í desember 2011 vegna endurútreiknings þessara lána og var sú fjárhæð notuð til niðurgreiðslu vaxtaberandi skulda gagnvart Arion.

Hagar telja sig eiga frekari kröfu á Arion í kjölfar dóms Hæstaréttar um miðjan febrúar sl. og nemur krafa Haga því 824 milljónum miðað við stöðuna 29. febrúar 2012. Ef dómur fellur Högum í vil hækkar verðmatsgengi Haga um 0,7 að öðru óbreyttu samkvæmt mati Íslandsbanka.

Eins og fram kom í fyrri frétt Vísis af málinu þá ber nokkuð á milli í niðurstöðum þessara mata. Þannig ráðlagði greining Íslandsbanka fjárfestum að selja bréf sín á meðan Arion banki mælir með því að viðskiptavinir kaupi hlut í Högum.

Arion banki álítur svo að virði hlutafjár Haga séu 24 milljarðar króna. Miðað við gengið 17, sem greining Íslandsbanka nefnir í sinni fyrirtækjagreiningu sem virðismatsgengi, er virði hlutafjár tæplega 20 milljarðar. Þarna munar því fjórum milljörðum á greiningum bankanna.