Fíkniefnastríðið er ekki tapað

Stríðið við fíkniefni eins og við þekkjum það er ekki tapað. Við ætlum ekki að breyta okkar afstöðu eða aðferðum í bili. Þetta segir Héðinn Svarfdal Björnsson, fyrir hönd embætti Landslæknis.

Í gær kom út skýrsla hjá Sameinuðu Þjóðunum þar sem því var lýst yfir að fíkniefnastríðið væri tapað, eins og greint var frá í frétt mbl.is. Samkvæmt skýrslunni væri hægt að koma í veg fyrir milljónir alnæmissýkinga og dauðsfalla ef afstöðunni í fíkniefnastríðinu væri breytt. Auk þess neyðast fíkniefnafíklar til að flýja dagsljósið og loka sig af í skuggasundum vegna baráttunnar.

Héðinn segir það sem fram kemur í skýrslunni ekki vera neinar byltingakenndar kenningar. Skaðaminnkun hefur lengi verið umrædd hugmyndafræði en hún felst í að liðsinna sjúklingum og fíklum í stað þess að líta á þá sem glæpamenn. Íslenskt dæmi um slíka starfsemi er Frú Ragnheiður á vegum Rauða krossins, en það auðveldar aðgengi að sárameðferð, hreinum nálum, sprautum og almennri fræðslu og kemur þannig í veg fyrir sýkingar.

„Ég myndi alls ekki segja að þessi skýrsla væri gömul tugga. Þetta er þarft innlegg. En við munum ekki breyta afstöðu okkar út af henni," segir Héðinn.

Hann bendir sömuleiðis á hina hlið málsins, þ.e. harla óviðeigandi sé að gefa skilaboð um að ásættanlegt sé að hafa á sér og nota slík efni. Það er ekki vænlegt að ætla að að gera vörslu fíkniefna löglega. „Við getum hins vegar ekki tekið beina afstöðu til þess enda væri það ekki inni á valdsviði Landslæknis," segir Héðinn.

Héðinn segir ofboðslega öfgafullt að segja að stríðið við fíkniefnin sé tapað og fara fram á að þau verði gerð lögmæt.