Tom Cruise farinn frá Akureyri

Tom Cruise er farinn frá Akureyri. Nágrannar hans við lúxusvilluna Hrafnabjörg, gegnt Akureyri, þar sem leikarinn góðkunni hefur dvalið undanfarið segja, í samtali við Akureyri Vikublað, að gæslubílll sé farinn þaðan og að flutningabíll hafi sótt dót sem leikarinn hafði með sér. Leikarinn góðkunni er staddur hér á landi til að taka upp myndina Oblivion, eins og þekkt er orðið. Tökuliðið Oblivion mun vera komið suður að Veiðivötnum og nágrenni þar sem tökur fara fram þessa dagana, eins og fram kom í Fréttablaðinu á mánudag.

Ýmsar getgátur hafa verið á kreiki um það hvernig Cruise hyggðist verja afmælisdeginum sínum, sem er næstkomandi þriðjudag. Eyfirðingar bjuggust við að hann yrði þar einhverstaðar á kreiki.

Fréttablaðið greindi líka frá því á dögunum að Cruise hygðist halda heilmikla veislu hér á landi. Vinum Cruise og eiginkonu hans, leikkonunnar Katie Holmes, verði boðið í veisluna. Í þeim hópi eru m.a. hjónin David og Victoria Beckham og Will og Jada Pinkett-Smith.