Krakkar í Kópavogi með hærri laun

Unglingar í vinnuskólanum í Kópavogi fá allt að þrjátíu prósent hærri laun en jafnaldrar sínir í vinnuskólanum í Reykjavík. Vinnuskólinn er á vegum sveitarfélagana sem ákveða sjálf laun unglingana.

Eins og flestir þekkja hafa unglingar í elstu bekkjum grunnskóla starfað í vinnuskóla á sumrin undanfarna áratugi. Helstu verkefnin eru oftast snyrting og fegrun bæja og borgar en þarna stíga flestir sín fyrstu skref á vinnumarkaði. Sveitarfélögin ráða sjálf yfir sínum vinnuskólum og störf og laun eru því ekki samræmd að fullu, þó verkefnin séu oftast svipuð.

Launin eru hins vegar ekki alls staðar þau sömu.

Sem dæmi má líta á laun unglinga í vinnuskóla Reykjavíkur annars vegar og Kópavogs hins vegar.

Í Reykjavík fá nemendur úr níunda bekk þrjú hundruð áttatíu og fjórar krónur á tímann, en í Kópavogi fá jafnaldrar þeirra fimm hundruð og eina krónu á tímann.

Þeir sem eru úr níunda bekk í vinnuskólanum í Kópavogi fá þannig þrjátíu prósent hærri laun en jafnaldrar þeirra í vinnuskólanum í Reykjavík.

Nemendur úr tíunda bekk í Reykjavík fá greiddar fimm hundruð og tíu krónur á tímann en jafnaldrar þeirra í kópavogi sex hundruð tuttugu og sex krónur á tímann. Það er um það bil tuttugu og þremur prósentum meira.

Eins og fyrr segir ákveða sveitarfélögin sjálf laun unglinga í vinnuskólanum. Á flestum stöðum hækkuðu launin um það bil um fimm prósent í ár en Kópavogsbær tók hins vegar ákvörðun um að hækka laun þeirra enn meira í ár.