Annþór og Börkur ekki áfram í einangrun

Lögreglan á Selfossi ætlar ekki að fara fram á áframhaldandi gæsluvarðhald yfir Annþóri Kristjáni Karlssyni og Berki Birgissyni, sem eru grunaðir um að hafa veitt Sigurði Hólm Sigurðarsyni, samfanga sínum, banvæna áverka um miðjan maí síðastliðinn.

Þeir hafa setið í einangrun á meðan rannsókn hefur staðið yfir. Bráðabirgðaniðurstöður krufningar benda til þess að Sigurður hafi látist af völdum innvortis blæðinga. Annþór og Börkur harðneita allri sök.

Að sögn lögreglu gengur rannsóknin vel en verst að öðru leyti allra frétta af málinu. Tvímenningarnir afplána nú eldri dóma í fangelsinu.