Margir fóru í Bláa lónið

Það þurfti ríflega hundrað rútur, á þriðja tug jeppa, báta og flugvélar til að koma farþegum skemmtiferðaskipa í ferðir á Suðurlandi í gær á einum annasamasta degi ársins í ferðaþjónustu.

Metfjöldi kom til Reykjavíkur í gær með skemmtiferðaskipum eða um tíu þúsund manns. Þar af á milli sex og sjö þúsund farþegar. Stór hluti þeirra að um fimm þúsund manns fóru í skiplagðar ferðir á vegum Atlantik sem er fyrirtæki sem býður upp á ferðir innanlands fyrir farþega skemmtiferðaskipa. Gunnar Rafn Birgisson framkvæmdastjóri Atlantik segir daginn hafa verið undirbúinn vel.

„Við erum búin að vinna að þessum degi síðan einhvern tímann á síðast ári. Þetta gerist ekki allt á einum degi," segir Gunnar Rafn.

Þá þurfti mörg faratæki til að koma öllum þangað sem þeir vildu.

„Ég held að við höfum verið með einhverstaðar í kringum 105 rútur og 25 eða 27 jeppa sem voru að flytja þetta fólk. Síðan voru náttúrulega ýmis önnur faratæki flugvélar, bátar og annað slíkt," segir hann.

Flestir vildu sjá íslenska náttúru en nokkrir fóru alla leið inn í Þórsmörk.

„Gullfoss og Geysir eru náttúrulega perlurnar sem að flestir þekkja og flestir vilja sjá. Síðan vorum við með ferðir líka á Reykjanesið, upp á Langjökul, hvalaskoðunarferðir, margir fóru í Bláa Lónið, það voru bæjarferðir," segir Gunnar.

Þá segir Gunnar daginn hafa gengið vel.

„Það gerðist í raun ekkert annað en það að það bilaði ein rúta og við gátum bjargað því án þess að það hefði áhrif á gesti," sagði Gunnar Rafn Birgisson.