Yfirtakan á SpKef eitt allsherjar klúður - einhver þarf að axla ábyrgð

Yfirtaka ríkisins á Sparisjóðnum í Keflavík er eitt allsherjar klúður sem einhver þarf að axla ábyrgð á, segir formaður Sjálfstæðisflokksins. Yfirtakan kostar ríkissjóð 19 milljarða króna, eða 8 milljörðum meira en gefið var út þegar sparisjóðurinn var sameinaður Landsbankanum.

Sparisjóðurinn í Keflavík, eða SpKef, var tekinn yfir af ríkinu í apríl 2010. Hinn 5. mars í fyrra var sparisjóðurinn svo sameinaður Landsbankanum.

Landsbankinn tók yfir skuldbindingar vegna innistæðna hjá SpKef og fékk í staðinn eignir sjóðsins, en ágreiningur reis um verðmæti þeirra.

Ríkissjóður taldi að greiða ætti 11 milljarða króna með innistæðunum. Landsbankinn taldi fjárhæðina nærri 30 milljörðum. Skipuð var úrskurðarnefnd vegna ágreiningsins og samkvæmt niðurstöðu hennar sem birt var í dag ber ríkissjóði að greiða Landsbankanum 19 milljarða, eða 8 milljörðum meira en lagt var upp með í fyrra.

Bjarni Benediktsson, formaður Sjálfstæðisflokksins, segir að einhver verði að axla ábyrgð á þessu.

„Mér finnst þetta mál vera eitt allsherjar klúður frá upphafi til enda. Í byrjun var sagt að þetta myndi ekki kosta ríkið neitt og það var tekin ákvörðun um að veita SpKef bráðabirgðastarfsleyfi þrátt fyrir að hann uppfyllti ekki kröfur. Smám saman hefur komið í ljós að það vantar mikið upp á að eignirnar standi undir verðmati. Fyrir rúmu ári síðan var sagt að það vantaði 11,2 milljarða en núna er þessi tala komin upp í 19 milljarða. Það sem átti ekki að kosta skattgreiðendur á Íslandi neitt mun kosta þá 19 milljarða króna. Nú er eðlilegt að spurt sé, hver ber ábyrgð á þessu klúðri?," segir Bjarni Benediktsson, formaður Sjálfstæðisflokksins.

En var ekki alltaf útlit fyrir að einhver kostnaður myndi lenda á ríkinu vegna falls SpKef vegna ríkisábyrgðar á innistæðum? Bjarni segir aðkomu ríkisins að SpKef óumflýjanlega.

„En það er hins vegar augljós krafa og ófrávíkjanleg að ákvarðanir á borð við þessar séu teknar á grundvelli góðra upplýsinga og eðlilegrar skoðunar á því eignasafni sem menn eru að fá í hendur. Síðan í framhaldinu að þannig sé farið með þetta eignasafn að það sé ekki að rýrna stanslaust á kostnað skattgreiðenda," segir Bjarni.