Kirkjan kom í veg fyrir að ég spilaði með Man. Utd

Portúgali nokkur er kominn í heimsfréttirnar eftir að hann ákvað að kæra baptistakirkjuna og fór fram á tæpa tvo milljarða í skaðabætur þar sem kirkjan hafi komið í veg fyrir möguleika hans á að spila fyrir Man. Utd.

Þetta er klárlega ein furðulegasta kæra sem komið hefur fram mjög lengi. Hinn 46 ára gamli Arquimedes Nganga gekk í kirkjuna er hann var 25 ára og það fór með ferilinn að hans mati.

Ástæðan fyrir því að Nganga vill fá svona háar bætur er að hann reiknaði með að hafa haft 200 þúsund pund í vikulaun hjá enska félaginu til fjölda ára.

"Ég hefði klárlega getað átt langan feril í úrvalsdeildinni. Ég sé marga leikmenn í deildinni sem eru lakari en ég. Þeir eru annað hvort varnar- eða sóknarsinnaðir. Ég var bæði," sagði Nganga hinn hressasti.

Hann lék sjálfur í portúgölsku 3. deildinni og fékk aldrei meira en 40 þúsund krónur í mánaðarlaun á ferlinum.