Krakkar hvattir til sumarlesturs

Í sumar efnir Borgarbókasafnið og Reykjavík Bókmenntaborg UNESCO til sumarlesturs fyrir börn á öllum aldri. Til að taka þátt þarf að koma við í einu af sex söfnum Borgarbókasafnsins þegar bók hefur verið lesin og skrifa nafn sitt, aldur, heiti bókar og símanúmer á blað í formi sólargeisla. Geislanum er svo komið fyrir á lestrarsólinni sem skáldfákurinn Sleipnir gætir í söfnunum.

Í hverri viku verður einn bókaormur dreginn úr pottinum. Sá fær bók að launum frá Forlaginu og verður jafnframt kynntur á Krakkasíðu Fréttablaðsins. Í sumarlok verður svo dregið úr nöfnum allra þátttakenda sumarsins. Sá ljónheppni sem kemur upp úr pottinum þá fær reiðhjól frá Erninum. - hhs