Gylfi Zoëga hlýtur Ásuverðlaunin

Gylfi Zoëga, hagfræðingur við Háskóla Íslands, hlaut í dag Ásuverðlaun Vísindafélags Íslendinga fyrir árið 2012.

Ferill hans sem vísindamaður á sviði hagfræði er sagður glæsilegur og hann þykir jafnframt hafa sýnt frábæran dugnað í að koma niðurstöðum rannsókna sinna á framfæri til almennings.

Verðlaun úr sjóði Ásu Guðmundsdóttur Wright eru veitt íslenskum vísindamanni, sem náð hefur framúrskarandi árangri á sérsviði sínu í vísindum eða fræðum og miðlað þekkingu sinni til framfara í íslensku þjóðfélagi.

Í tilkynningu sem stjórn sjóðsins sendi frá sér í dag segir:

Í aðdraganda og kjölfar fjármálakreppunnar árið 2008 varð mikil umræða um gjaldmiðilsmál, verðbólgu, vexti og áhrif gengis á verðlag. Margir erlendir hagfræðingar voru kallaðir til.

En brátt kom í ljós að Ísland átti hæfa hagfræðinga sem gátu leiðbeint ekki aðeins nemendum sínum, heldur bæði stjórnvöldum og almenningi. Síðan þá hefur Gylfi Zoëga gefið fjölda viðtala og veitt almenningi aðgengilega fræðslu um hagfræðileg málefni.

Gylfi hefur meðal annars fjallað um kosti og galla sjálfstæðrar peningastefnu, vanda okkar gagnvart spákaupmönnum á gjaldeyrismarkaði, stöðu evrunnar og vanda evruríkjanna. Hann hefur lýst því hvernig innflæði erlends lánsfjár orsakaði góðæri áranna fyrir fjármálaáfallið árið 2008 og útflæði þá kreppu sem hér hefur verið undanfarin ár.

Gylfi hefur fært rök að því að takmarka þurfi kvikar fjármagnshreyfingar milli landa vegna þess að þær séu uppspretta óstöðugleika og einnig þurfi að takmarka möguleika einstaklinga og fyrirtækja til þess að taka lán í erlendum gjaldmiðlum. Jafnframt þurfi að draga úr áhættusömum fjárfestingum viðskiptabanka.

Hefur hann haldið því fram að samstarf Íslands við Alþjóðagjaldeyrissjóðinn hafi hjálpað landinu úr ógöngum. Sjóðurinn hafi gætt þess að heilsteyptri efnahagsstefnu væri fylgt en slíka samhæfingu hafi löngum skort.