Tvær háar brýr yfir Elliðaár

Tvær brýr fyrir gangandi vegfarendur og hjólreiðamenn munu rísa við Elliðaárósa á næstunni. Burðarrammar þeirra munu ná átján metra upp í loftið og vera 40 metra langir. Borgin og Vegagerðin standa að framkvæmdinni og hafa veitt 160 milljónir króna í verkið.

Haldin var samkeppni um hönnun brúnna fyrr í ár, en í dómnefndarálitinu er vinningstillagan sögð „einföld, frumleg og djarfleg“.

Í áliti dómnefndarinnar segir að mannvirkið geti orðið ákveðið kennileiti, vakið áhuga fólks á svæðinu og stuðlað að aukinni notkun svæðisins til útivistar.  Ámundi Brynjólfsson, formaður dómnefndarinnar, segir brýrnar hluta af stærri betrumbótum á samgöngukerfi þessa svæðis.

„Brýrnar eru hluti af hjólreiðaáætlun Reykjavíkurborgar sem var samþykkt í borgarstjórn fyrir nokkru síðan og hefur það að markmiði að gera hjólreiðar að almennum samgöngumáta.

Framkvæmdirnar við Elliðaárnar stytta vegalengdina frá Grafarvogi og Mosfellsbæ niður í miðbæ um 700 metra.“ Ámundi segir að dómnefndinni hafi fundist brúin passa vel á þessum stað. „Þetta þykir áberandi en ekki yfirþyrmandi í umhverfinu.“

Karl Sigurðsson, formaður umhverfis- og samgönguráðs, segist ánægður með tillöguna.

„Mér finnst hún mjög fín, ég er mjög hrifinn af þessari vinningstillögu. Mér fannst reyndar tillögurnar í þremur efstu sætunum mjög góðar. Það hefur verið erfitt fyrir dómnefndina að velja.“

Gert er ráð fyrir að verkið verði sett í útboð í september og að verklok verði í maí 2013.

katrin@frettabladid.is