Gríðarleg aukning utankjörfundaratkvæða

Nú hafa alls 10663 greitt atkvæði utankjörfundar í forsetakosningunum. Heildarfjöldi aðsendra atkvæða er 1086, en aðsend atkvæði koma frá öðrum sýslumönnum eða erlendis frá. Í Reykjavík hafa 5907 greitt atkvæði utankjörfundar. Þar af eru aðsend atkvæði 546.

Bergþóra Sigmundsdóttir, deildarstjóri hjá Sýslumanninum í Reykjavík, segir að þetta sé aukning um 40% frá því í þingkosningunum 2009 en ekki er hægt að bera tölurnar saman við forsetakosningarnar 1996 eða 2004. „Það var mjög lítil þátttaka í forsetakosningunum síðast og við erum ekki með nógu góðar tölur til samanburðar frá forsetakosningunum 1996," segir Bergþóra.

Bergþóra segir einkum tvennt geta skýrt þessa aukningu. Annars vegar er fólk mikið á faraldsfæti. „Nú er hásumar og fólk í sumarleyfum. Þetta eru einu kosningarnar um hásumar sem ég man eftir," segir Bergþóra. „Annar þátturinn er sá að fólk er farið að líta á utankjörfundaratkvæðagreiðsluna sem hluta af kosningunni," segir Bergþóra. Þá er nokkur fjölgun atkvæða sem koma erlendis frá.

Þess bern að geta að kosið er næsta laugardag, en þann laugardag ber uppi um fyrstu helgina í júlí. Það er alla jafna önnur stærsta ferðamannahelgi ársins.