Munaði hársbreidd að eldur bærist inn á trésmíðaverkstæði

Það munaði aðeins sekúndum að stórtjón yrði þegar eldur kviknaði við trésmíðaverkstæði í Vestmannaeyjum í nótt. Eigandinn segir þetta hafa verið skelfilega lífsreynslu og þakkar slökkviliðinu að ekki fór verr. Grunur er um íkveikju.

Það var um hálfþrjúleytið í nótt sem að slökkviliðinu í Vestmannaeyjum barst tilkynning um eld við trésmíðaverstæði í bænum. Eldur logaði í þá tveimur bílum við hlið hússins. Eldtungur teygði sig upp marga metra og ógnuðu verkstæðinu. Eigandinn segir litlu hafa mátt muna illa færi.

„Það er bara hægt að þakka það slökkviliðinu og þeim sem að þessu komu að ekki fór verr. Hér hefði getað orðið tugmilljóna tjón ef það hefði farið inn á verkstæðið sko. Það munaði litlu. Þetta er bara spurning um sekúndur sko. Glerið var orðið sprungið og orðið opið inn á efri hæðinni og það hefði ekki verið að sökum að spyrja ef að það hefði farið eldur þar inn," segir Erlendur Pétursson, trésmíðameistari.

„Þetta er svo mikill eldmatur á svona stað að það yrði illviðráðanlegt," segir Erlendur og segir hafa verið erfiða tilfinningu að sjá á eldhaf við verkstæði sitt.

„Hún er bara skelfileg og þegar það er hringt í mann um hánótt og sagt að verkstæðið sé að brenna það er mjög ónotarlegt," segir hann.

Unnið er að rannsókn málsins. Lögregla telur að kveikt hafi verið í bílunum tveimur en þeir voru báðir ógangfærir.