Sparneytin ökutæki þyngja pyngjuna

Ökumenn geta sparað sér á annað hundrað þúsund krónur á ári með því að velja sér sparneytnari bíla. Þetta segir framkvæmdastjóri Orkuseturs Orkustofnunar og hann bendir á að þetta sé hægt með því að velja sambærilegan bíl.

Orkusetur hefur tekið í notkun á heimasíðu sinni nýjar reiknivélar sem hjálpa ökumönnum að átta sig betur á kostnaðinum við að aka á milli staða. Þar sem elsneytisnotkun bíla er mjög mismundandi þá er reiknivélin útbúin þannig að slegið er inn bílnúmer til að sjá nákvæmlega hversu hversu langt hægt er að aka á tilteknum bíl.

Orkusetur bar eyðslu tveggja sambærilegra fólksbíla saman fyrir fréttstofuna. Reiknivél hennar sýnir að í dag dugir bensínlíterinn 26 kílómetra í innanbæjarakstri ef ekið er á Toyota Prius en aðeins 11 kílómetra ef ekið er á Toyota Avensis.

Þá þarf ökumaður á Toyota Priusnum að greiða tæpar 7000 krónur fyrir eldsneyti ef hann ekur frá Reykjavík á Akureyri og tilbaka. Ökumaður hins bílsins þarf hinsvegar að borga hátt í ellefu þúsund krónur fyrir eldsneytið.

Framkvæmdastjóri Orkuseturs segir reiknivélarnar hjálpa fólki að átta sig betur á hversu mikið bensín mismunandi bifreiðar nota.

„Það hefur í raun og veru aldrei verið meiri munur en núna hjá bílaframleiðendum á eldsneytisneyslu nánast sambærilegra bifreiða. Það er ekki bara fólk sem spara heldur þjóðarbúið og ef að við öll tökum í raun og veru réttari ákvarðanir og förum að velja elsneytisnýtnari bifreiðar þá getur þjóðarbúið farið að spara þegar að öll breytingin er komin í gegn í flotanum tugi milljarða í gjaldeyri á ári," segir Sigurður Ingi Friðleifsson, framkvæmdastjóri Orkuseturs.

Sigurður segir hægt að spara á annað hundrað þúsund með því að velja sér sparneytnari bíl. Þannig sýnir reiknivél Orkuseturs að ökumaður Priusins eyðir 113 þúsund krónum minna í eldsneyti á ári en ökumaður hins bílsins.

„Það er mikill munur bara á venjulegum bifreiðum. Þú þarft ekki að fara úr stórum bifreiðum í einhvern pínulítinn til að ná fram eldsneytisparnaði þú þarft bara að velja rétta bílinn í hverjum stærðarflokk," segir Sigurður.