„Hvílík skepna hefur þessi biskup verið“

„Hvílík skepna hefur þessi biskup verið," segir séra Baldur Kristjánsson, sóknarprestur í Ölfusi, um Ólaf Skúlason. Tilefnið er viðtalsþáttur við dóttur Ólafs, Guðrúnu Ebbu, sem sýndur var á RÚV í gær.

„Ég fylltist óhug yfir sjónvarpinu í gær og sit hér morguninn eftir sem lamaður," segir Baldur í pistli sem hann kallar ,,Skriftamál uppgjafaprests" og birtist á Eyjunni. Séra Baldur var biskupsritari í biskupstíð Ólafs. Hann segir í pistlinum að fjölskylda Ólafs hafi verið mjög elskuleg og góð, eins og hann hafi kynnst henni. Fyrirmyndarfjölskylda. 

Baldri var sagt upp störfum á Biskupsstofu eftir að Ólafur Skúlason hætti sem biskup. „Það kom mér í opna skjöldu. Ég hafði verið í óvinsælli eldlínu í þrjú og ár og hafði einhvern veginn ekki búist við því að vera settur út á tröppur. Þegar ég fór að sækja um atvinnleysisbætur hélt fólkið í afgreiðslunni og röðinni að ég væri að grínast. Ég fór ekki aftur. Var atvinnlaus í hálft ár,“ segir Baldur.