Ráðhúsvörður leitaði horfins borgarfulltrúa

„Mér hefur dálítið verið strítt fyrir þetta,“ segir Eva Einarsdóttir borgarfulltrúi, sem missti næstum af atkvæðagreiðslu á borgarstjórnarfundi vegna salernisferðar.

Eva var kjörin borgarfulltrúi Besta flokksins í vor en hefur þar til nýlega verið í fæðingarorlofi. Því er hún tiltölulega óreynd í starfinu. Á fundi borgarstjórnar á þriðjudag var á dagskrá tillaga Besta flokksins og Samfylkingarinnar um úttekt á stjórnsýslu borgarinnar í aðdraganda bankahrunsins.

Eva útskýrir að á meðan ekki sé beinlínis verið að greiða atkvæði geti borgarfulltrúar brugðið sér stuttlega frá, til dæmis til að svara símtölum, án þess að kalla verði inn varamenn.

„Ég sem ný manneskja vildi alls ekki víkja úr sal heldur heyra allt og beið þangað til ég gat ekki beðið lengur,“ segir Eva, sem kveður félaga sína í Besta flokknum hafa sagt vera í lagi fyrir hana að skreppa fram. Hún hafi hins vegar ekki gert sér grein fyrir að umræðunum um málið var að ljúka á þeim tímapunkti og ekki annað eftir en að greiða atkvæði.

„Þetta voru bara byrjendamistök í sinni tærustu mynd. Þegar ég kom fram aftur var vörður að leita að mér. Það var frekar vandræðalegt,“ lýsir Eva.

Vegna þess að hún var ekki í borgarstjórnarsalnum þegar ganga átti til atkvæða var Eva skráð út af fundinum og S. Björn Blöndal, aðstoðarmaður borgarstjóra og níundi maður á lista Besta flokksins, skráður inn sem varamaður í hennar stað.

„En ég kom síðan hlaupandi inn og rétt náði að rétta upp hönd,“ segir Eva. Tillagan var í tveimur liðum og Eva náði að taka þátt í að afgreiða síðari lið hennar.

Varamenn, aðrir en 1. varaborgarfulltrúar, eiga rétt á 20.228 króna greiðslu fyrir að taka sæti á borgarstjórnarfundum. Samkvæmt upplýsingum úr Ráðhúsinu afsalaði S. Björn Blöndal sér þessari þóknun. Hann var skráður á fundinn í eina mínútu.

Síðar á borgarstjórnarfundinum fór fram atkvæðagreiðsla um að Eva tæki við formennsku í íþrótta- og tómstundaráði af Diljá Ámundadóttur. „Þá passaði ég mig á að sitja inni í sal,“ segir Eva, reynslunni ríkari.

gar@frettabladid.is