Handboltakappi hannar föt

„Ég byrjaði að fikta við að þrykkja myndir á boli fyrir svona 3-4 árum. Það er ágætt að geta kúplað sig út úr boltanum stundum,“ segir Róbert Gunnarsson, landsliðsmaður í handbolta. Hann hefur nú opinberað áhugamál sitt og er byrjaður að selja boli úr sinni smiðju til landsmanna. Róbert hannar undir nafninu Þessi feiti sem er heldur óvanalegt nafn á fatahönnun. „Snorri Steinn á heiðurinn að nafninu. Mér fannst þetta fyndið og er kallaður þessu nafni af ákveðnum hópi,“ segir Róbert kátur en þegar Fréttablaðið náði tali af honum var hann í rútu á leið til Flensborgar með liði sínu, Rhein-Neckar Löwen.

Róbert býr í Þýskalandi ásamt fjórum börnum og eiginkonu sinni, Svölu Sigurðardóttur, en hún er dugleg að aðstoða hann í hönnunarferlinu. „Ég fékk hugmyndina því ég fann engan bol sem mér líkaði í búðunum,“ segir Róbert sem byrjaði á að koma sér upp aðstöðu í kjallaranum heima hjá sér. „Þetta var frekar lengi í fæðingu og ég gerði endalaus mistök í byrjun. Nú er ég búinn að ná tækninni.“

Róbert þrykkir myndir á stutt- og langerma boli en hann leggur mikinn metnað í að bolirnir séu úr vönduðu efni. „Ég kaupi boli frá verksmiðju sem gerir allt úr lífrænni bómull enda vil ég ekki selja boli sem hnökra og teygjast strax.“

Hingað til hafa aðeins ættingjar og vinir handboltakappans fengið að njóta hönnunar hans en Róbert hefur verið að gera myndir á boli, sængurver og barnaföt. „Já, síðan ég byrjaði hefur fólkið í kringum mig bara fengið mína hönnun í gjafir og það hefur mælst vel fyrir. En ég trúi þeim ekki og fannst rétt að sýna hönnunina fólki sem ég þekki ekkert. Ef aðrir en vinir mínir og ættingjar kaupa bol af mér er það stærsta hrósið sem ég get fengið,“ segir Róbert sem viðurkennir að hann geti alveg hugsað sér að gera áhugamálið að atvinnu þegar handboltaferlinum lýkur. „Það blundar smá listaspíra í manni.“

Bolirnir frá Þessum feita eru til sölu á hárgreiðslustofunni Circus Circus á Laugavegi 94 og á Facebook-síðu merkisins.

alfrun@frettabladid.i