Hættan á tapi betri en of mikið eftirlit

Árni Páll Árnason, efnahags- og viðskiptaráðherra, segir að auka þurfi tapsáhættu fjármálafyrirtækja. Ráðherrann talaði á haustráðstefnu KPMG, þar sem sjónum var beint að eftirliti.

Árni Páll sagði að tapsáhættu fjármálafyrirtækja hefðu hingað til verið settar þröngar skorður. Íslenskt réttarumhverfi hefði takmarkað niðurfærslu krafna án gjaldþrotameðferðar að miklu leyti og einstaklingar hefðu verið settir undir mannfjandsamlega gjaldþrotalöggjöf. „Þar með hefur verið skapaður sá rammi að fjármálafyrirtækjum væri gert mjög auðvelt að sækja kröfur á hendur jafnt einstaklingum og fyrirtækjum.“

Ráðherrann sagði að undanfarin misseri hefði þessari umgjörð verið breytt í grundvallaratriðum.

„Við verðum að venja okkur við það sem þjóð að afskriftir krafna eiga að vera algengari í framtíðinni og tapsáhætta fjármálafyrirtækja meiri. Það er besta leiðin til að verja almenning fyrir áföllum af starfsemi fjármálafyrirtækja, að auka tapsáhættu þeirra hvers um sig af eigin starfsemi. Þannig hvetjum við best til varkárni í rekstri þeirra og að þau axli sína samfélagslegu ábyrgð í rekstrinum.“

Árni Páll sagði ljóst að ekki væri hægt að hafa stjórn á fjármálamörkuðum í gegnum eftirlit. Takmörk séu fyrir því hverju hægt er að ná fram með reglum og eftirliti.

„Við getum aldrei vænst þess að eyða áhættu úr fjármálakerfinu með því einu að hafa nógu marga í vinnu hjá opinberum eftirlitsstofnunum. Það er alveg sama hvað þeir láta sér detta í hug að byrgja marga brunna, nýsköpunargetan í fjármálakerfinu er eðli málsins samkvæmt svo mikil að það verða búnir til fleiri brunnar en eftirlitsaðilar geta látið sér detta í hug að byrgja.“

Árni Páll segir mikilvægt að leggja grunninn að heildstæðri sýn á fjármálamarkaði; hvað hverjum og einum sé ætlað að gera og hvernig hægt sé að tryggja að allir aðilar á markaðnum geti náð eins miklum árangri og mögulegt er, veitt þjónustu með eins litlum tilkostnaði fyrir almenning án óásættanlegrar áhættu.

kolbeinn@frettabladid.is