Hélene Magnússon - Einn helsti málsvari íslenskra hannyrða

Fáum hefði dottið í hug að franskur lögfræðingur og hönnuður myndi standa í fremstu víglínu í kynningu á íslensku prjóni erlendis. Hélène Magnússon er einn helsti málsvari íslenskra hannyrða en í lok næsta árs gefur hún út tvær bækur á ensku um íslenskar hannyrðir sem koma meðal annars út í Kanada og Bandaríkjunum og verða til að mynda seldar hjá vefbókarisanum amazon.com.

Hélène er auk þess potturinn og pannan í því að koma fyrsta íslenska vefprjónaritinu á koppinn en hún gefur út vefritið Prjónakerling á prjonakerling.is. Þar hafa Íslendingar sem og útlendingar keypt uppskriftir að hönnun Hélène og nokkurra annarra hönnuða. Þá stendur hún fyrir prjónaferðum í samstarfi við Íslenska fjallaleiðsögumenn nú í sumar þar sem prjónað verður á leiðinni yfir Fimmvörðuháls sem og á Norðurlandi.

Önnur bók Hélène fjallar um algjöran frumkvöðul í íslenskum hannyrðum, Aðalbjörgu Jónsdóttir, sem vakti athygli hér heima og erlendis fyrir kjóla sem hún hannaði og prjónaði úr íslensku eingirni í lok áttunda áratugarins.

Aðalbjörg er 94 ára gömul í dag og í bók Hélen verður uppskrift að kjól Aðalbjargar en framleiðsla á svipuðu eingirni og því sem Aðalbjörg notaðist við er í þróun og mun bera heitið Love Story. Kristín Schmidhauser Jónsdóttir verður einnig með innslag í bókinni og skrifar um ævi Aðalbjargar.

„Kjólarnir hennar Aðalbjargar eru einstakir, ekki bara hérlendis heldur í alþjóðlegu samhengi. Þess vegna fór ég upphaflega á stúfana að skoða verk hennar sem endaði með því að ég hitti hana og fór að skrifa þessa bók. Kjólarnir hennar vöktu mikla athygli á sínum tíma, hérlendis og erlendis, og þekktar konur sem klæddust þeim, þar á meðal Vigdís Finnbogadóttir."

Talið er að Aðalbjörg hafi hannað og prjónað um 100 kjóla á sínum tíma, sem er ótrúlegur fjöldi, í ljósi þess að það að prjóna hvern og einn var um mánaðarvinna. Fyrsti kjóll Aðalbjargar var sýndur á Norrænu heimilisiðnaðarsýningunni en Aðalbjörg lærði kjóla- og kápusaum.

„Umheimurinn þarf að uppgötva Aðalbjörgu ekki síður en íslenskar hannyrðir sem eiga sér svo langa sögu. Hin bókin mín er einmitt um íslenskar hannyrðir og mun einnig koma út á ensku á næsta ári," segir Hélène.

„Ég hef bæði óþrjótandi áhuga á íslensku prjónahefðinni og hef líka reynslu sem fjallaleiðsögumaður á Íslandi, sem varð til þess að ég fór út í að skipuleggja prjónaferðir hingað til lands. Þær sem ég stend fyrir í sumar eru fullbókaðar en ferðalangarnir koma frá Frakklandi, Bandaríkjunum, Kanada og víðar að."

Heimasíða Prjónakerlingar, er nýfarin í loftið og er aðgengileg á þremur tungumálum, frönsku, ensku og íslensku. Þar inni má finna allt um rannsóknir og hönnun Hélène sem og aðra spennandi hluti er snerta prjónaheiminn. Næsta tölublað Prjónakerlingar kemur út í lok apríl. Þess má geta að bókinni um Aðalbjörgu er ætlað að koma út árið 2013 á íslensku og frönsku.

juliam@frettabladid.is