Telja Vaðlaheiðargöng ekki standa undir sér

„Fullyrðingar um að vegatollar standi undir gerð Vaðlaheiðarganga er í besta falli óskhyggja,“ segir í nýútkomnu blaði Félags íslenskra bifreiðaeigenda (FÍB).

„Í versta falli eru áhugamenn um gerð ganganna vísvitandi að blekkja stjórnvöld, vitandi að galtómur ríkissjóður mun þurfa að taka á sig verulegan hluta af kostnaðinum,“ segir áfram í blaði FÍB. Þar er ítarlega farið í saumana á áætlunum um kostnað, umferð og tekjur vegna Vaðlaheiðarganga.

Samkvæmt núverandi mati félagsins Greiðrar leiðar, sem á 49 prósenta hlut í nýstofnaða félaginu Vaðlaheiðargöngum hf. á móti Vegagerðinni, mun kostnaður við Vaðlaheiðargöng verða 10,4 milljarðar króna.

FÍB hefur hins vegar reiknað út að heildarkostnaður með stofnkostnaði og fjármagnskostnaði verði á bilinu 14,5 til 17,3 milljarðar króna eftir því hvaða vextir fáist.

„Áætlanir Greiðrar leiðar gera ráð fyrir þriggja prósenta fjármagnskostnaði,“ segir Runólfur Ólafssson, framkvæmdastjóri FÍB. Hann fullyrðir að enginn fjárfestir vilji koma að slíkri framkvæmd sem beri í sér ákveðna áhættu, meðal annars vegna vatnsaga, með þriggja prósenta ávöxtun. „Til samanburðar hefur fjármagnskostnaður vegna Hvalfjarðarganga verið um 9 prósent,“ bendir Runólfur á.

Þá dregur FÍB í efa áætlanir Greiðrar leiðar um umferð um göngin, sérstaklega sé hlutur ganganna í framtíðarumferð um Vaðlaheiði ofreiknaður að sumarlagi. Þá þurfi, samkvæmt útreikningum FÍB, vegatollar að vera minnst 1.100 krónur, en ekki 800 krónur eins komi fram í áætlunum Greiðrar leiðar. „Hver vill borga 1.100 krónur til að spara 400 krónur og níu mínútur,“ spyr FÍB sem telur einsýnt að mikill kostnaður lendi á ríkissjóði á sama tíma og brýnni verkefni bíði, til dæmis Norðfjarðargöng. Ótækt sé að „lauma“ mörg hundruð króna árlegum skuldbindingum á ríkissjóð.

„Í þessari framkvæmd er hugmyndin að ríkið ábyrgist allar lánveitingar. Þá er eðlilegt að uppi á borðum séu allar upplýsingar um hvort þetta sé hagkvæmt eða mögulegt fyrir sjálfsaflafé einvörðungu,“ segir Runólfur. „Það þarf að skýra það nánar að ríkissjóður, sem í öðru orðinu er sagður ekki eiga krónu með gati til nokkurra framkvæmda, getur allt í einu orðið ábyrgur fyrir 10,4 milljarða króna framkvæmd.“gar@frettabladid.is