Icelandair seinkar öllu flugi

Icelandair hefur ákveðið að seinka öllu flugi í fyrramálið, föstudagsmorgun, til klukkan 9:00 vegna spár um ofsaveður á Suðurnesjum. Um er að ræða flug til borganna Osló, Stokkhólms, Kaupmannahafnar, London, Manchester/Glasgow, Amsterdam og Parísar. Þá má sömuleiðis gera ráð fyrir seinkun á fluginu frá New York, Seattle og Boston til landsins í fyrramálið af sömu ástæðu. Þessar seinkanir eru ennfremur líklegar til þess að hafa áhrif á bottfarar- og komutíma síðdegis.

Veðurspár gefa til kynna að dragi mjög úr vindi snemma dags á morgun, en vegna óvissunnar eru farþegar hvattir til að fylgjast með upplýsingum um komu- og brottfarartíma á Keflavíkurflugvelli, t.d. ef nauðsynlegt verður að seinka fluginu enn frekar.