„Mín fyrstu viðbrögð eru undrun og vonbrigði"

Hjördís Þóra Sigurþórsdóttir, formaður Verkalýðsfélagsins Afls á Austurlandi, undrast ákvörðun Félagsdóms sem meinaði fiskvinnslufólki að fara í verkfall. Hún segir kurr í félagsmönnum.

Félagsdómur hefur úrskurðað að boðuð verkföll starfsmanna verkalýðsfélaganna Afls og Drífanda í fiskimjölsverksmiðjum sé ólögmætt.

„Mín fyrstu viðbrögð eru undrun og vonbrigði," segir Hjördís. „Mér skilst að verkföllin hafi verið dæmd ólögmæt á þeim forsendum að ekki hafi verið boðað til formlegs fundar í deilunni. Ég er hissa á því þar sem þrír fundir voru haldnir hjá ríkissáttasemjara. Ég veit ekki hve formlegri samningafundir geta orðið."

Það voru samtök atvinnulífsins sem kærðu verkfallsboðun verkalýðsfélaganna Afls á Austurlandi og Drífanda í Vestmannaeyjum. Samtökin sögðu að stéttarfélögin hafi sett fram kröfur um launahækkanir upp á tugi prósenta og að verkfall hefði verulegt tjón í för með sér fyrir samfélagið í heild.

Hjördís segir að með úrskurði félagsdóms hafi eðlilegum rétti fólks verið varpað fyrir róða með lagaflækjum. „Ég kalla þetta bara lagaflækjur að festa sig í svona atriðum," segir hún.

Hjördís segir næstu skref þau að samninganefndin komi saman og meti stöðuna. Spurð um viðbrögð sinna félagsmanna segir hún: „Ég á von á því að það sé kurr í fólki út af þessu."