Engar hækkanir á vaski eða tekjuskatti einstaklinga

Forystumenn ríkisstjórnarinnar segja að engar hækkanir verði á virðisaukaskatti eða tekjuskatti einstaklinga í fjárlögum næsta árs.

Meðal þeirra leiða sem voru til skoðunar fyrr í sumar til að auka tekjuöflun ríkisins var að koma á einu virðisaukaskattsþrepi. Þingmannanefnd á vegum stjórnarflokkanna skoðaði þessar leiðir sérstaklega.

Virðisaukaskatturinn lækkaði á matvæli úr 24,5 prósentum í 7 prósent hinn 1. mars 2007, en fyrr í sumar var til athugunar að samræma virðisaukaskattsprósentuna á ný þannig að hún væri hin sama á bæði matvælum og fatnaði og annarri neysluvöru. Í dag er virðisaukaskatturinn með misháa prósentu eftir vöruflokkum, en t.d bera fatnaður, raftæki og bílar 25,5 prósenta skatt. Þetta kom til umræðu en ekki var fyrir þessu áhugi.

Oddný Harðardóttir, formaður fjárlaganefndar Alþingis, situr í þingmannanefndinni. Hún sagði í samtali við fréttastofu Stöðvar 2 og Vísis að nefndin hefði ekki lagt þessar breytingar á virðisaukaskattskerfinu til heldur hafi nefndinni verið falið að skoða þær.

Oddný segir að þingmannanefndin hafi gengið út frá því að leita leiða til að forðast hækkanir á útgjöldum almennings. AGS hafi lagt einföldun kerfisins til, en hún segir að full ástæða sé til að samræma ákveðin þrep, t.d séu lyfseðilsskyld lyf í efsta skattþrepi með 25,5 prósenta vask og barnaföt einnig.

Engar breytingar að svo stöddu

Steingrímur J. Sigfússon, fjármálaráðherra og Jóhanna Sigurðardóttir, forsætisráðherra, sögðu síðan eftir ríkisstjórnarfund í morgun að ekki stæði til að gera breytingar á virðisaukaskattkerfinu að svo stöddu.

Það var Alþjóðagjaldeyrissjóðurinn sem lagði til breytingar á virðisaukaskattskerfinu en ekki verður ráðist í þær núna. „Það var kannski tvennt sem þeir (AGS) bentu sérstaklega á, að draga úr þessum mikla mun á milli efra þreps og neðra þreps, hann er óvenju mikill á Íslandi. Og svo í öðru lagi sem framtíðarmarkmið að fara yfir í eitt þrep. Um það geta verið fullgildar, mjög skiptar skoðanir. Það eru ýmis sjónarmið uppi í þeim efnum, auk þess yrði slíkt aldrei gert án verulegrar millifærslu á móti til að mæta þeim sem yrðu fyrir íþyngjandi áhrifum. Tekjulágum fjölskyldum, menningunni og slíku. Við höfum farið yfir þetta eins og mjög margt annað, en niðurstaðan er sú að það er ekki gert ráð fyrir breytingum í þessum efnum í þessari umferð," segir Steingrímur.

Þá sagði Steingrímur að ekki yrði ráðist í breytingar á tekjuskatti einstaklinga í fjárlögum næsta árs. „Það verða ekki hækkanir á almennu þrepunum í virðisaukaskattskerfinu og það er ekki gert ráð fyrir breytingum á tekjuskatti einstaklinga," sagði Steingrímur J. Sigfússon, fjármálaráðherra eftir ríkisstjórnarfund í morgun. thorbjorn@stod2.is