Efast um „alkunna“ ályktun Hæstaréttar

Farið hefur verið fram á að Hæstiréttur taki upp ákvörðun sína um ógildingu kosninganna til stjórnlagaþings vegna galla á málsmeðferðinni og að ógildingin verði felld úr gildi ellegar atkvæði talin á nýjan leik.

Gísli Tryggvason, einn þeirra 25 sem náðu kjöri á stjórnlagaþingið, lagði fram beiðni um þetta í Hæstarétti í gær. Hún var unnin í samstarfi við nokkra aðra úr hópi hinna kjörnu og kynnt meirihluta 25-menninganna á fundi í fyrrakvöld þar sem hún mæltist vel fyrir að sögn Gísla.

Rökin fyrir endurupptöku eru þau að málið geti ekki talist fullrannsakað af hálfu Hæstaréttar. Ákvörðunin byggist að miklu leyti á þeim ágalla á kosningunni að atkvæði hafi verið rekjan­leg til kjósenda. Um það atriði segir í niðurstöðu Hæstaréttar að „alkunna" sé að stemma af fjölda kjósenda sem mæta á kjörstað með því að rita nafn nöfn þeirra í þeirri röð sem þeir mæta. Vegna þess að kjörseðlar voru merktir með auðkennisnúmerum hefði þannig mátt komast að því hver átti hvaða seðil.

Í endurupptökubeiðninni er þessu mótmælt sem ósönnuðu, og meðal annars vitnað til nokkurra einstaklinga sem starfað hafa að kosningum og kannast ekki við skráningu af því tagi sem Hæstiréttur lýsir sem alkunnu verklagi. Því er það mat Gísla að Hæstiréttur hafi byggt ákvörðun sína á röngum eða ófullnægjandi upplýsingum og beri að skoða málið á nýjan leik og kanna það þá til hlítar.

Verði fallist á endurupptökubeiðnina er það aðalkrafa Gísla að ákvörðun Hæstaréttar verði snúið og kosningin talin gild, enda hafi ekkert komið fram um að ágallarnir hafi haft áhrif á niðurstöðu kosninganna.

Varakrafan er sú að atkvæðin verði talin á nýjan leik, og leggur Gísli til að þá yrði komið í veg fyrir öll vafaatriði; auðkenni afmáð og ný færð inn ef þurfa þykir, óháð hinum, talningin fari fram fyrir opnum dyrum og jafnvel handvirkt.

„Tíminn er naumur - það er vika til stefnu," segir Gísli, og vísar til þess að stjórnlagaþing hefði átt að taka til starfa 15. febrúar. Hann vonast til að botn fáist í málið fyrir þann tíma. stigur@frettabladid.is