Steingrímur: Engin krafa um afsökunarbeiðni

Enn eru harðar deilur í þingflokki Vinstri grænna en þremenningarnir sem sátu hjá við afgreiðslu fjárlaga saka meirihlutann á Alþingi um ofríki. Þá krefja þeir starfandi formann þingflokks Vinstri grænna um opinbera afsökunarbeiðni. Slík krafa var ekki sett fram á fundi þingflokksins í dag, að sögn Steingríms J. Sigfússonar.

Á þingflokksfundi á miðvikudaginn í síðustu viku lögðu Atli Gíslason, Ásmundur Einar Daðason og Lilja Mósesdóttir, þau hin sömu og sátu hjá við afgreiðslu fjárlaga, fram greinargerð þar sem þau svara Árna Þór Sigurðssyni, starfandi þingflokksformanni, en hann sakaði þau um að reyna að þvinga ríkisstjórnina til að skipta um stefnu í greinargerð sem hann lagði fyrir þingflokkinn daginn fyrir Þorláksmessu.

Í greinargerðinni segja þremenningarnir að tillögur þeirra hafi ekki fengið málefnalega umræðu í þingflokknum. Þá segja þau að viðbrögð meirihlutans við tillögum þeirra líkist því sem í rannsóknarskýrslunni var kallað „ofríki meirihlutans og framkvæmdavaldsins á þingi." Þá segja þau niðurskurðinn í fjárlögum fyrst og fremst hafa verið „pólitíska ákvörðun meirihlutans." Jafnframt segja þau fordæmingu Árna Þórs á ummælum Lilju byggða á rangfærslu og því sé ástæða til að fara fram á opinbera afsökunarbeiðni hans.

Þingflokkurinn kom saman í Aðalstræti í dag í annað sinn til þess að reyna jafna ágreininginn. Um fjögur leytið var gert fundarhlé. „Við erum alltaf að ræða málin," sagði Steingrímur. Hann sagði að krafa um afsökunarbeiðni hefði ekki verið sett fram á þingflokksfundinum sjálfum. „Ég hef hvergi séð það nema þá í fjölmiðlum."

Steingrímur sagðist líta á þremenninganna sem hluta af stjórnarliðinu.