ESB-viðræðunum kann að verða slitið þyki ástæða til

Ekki er fullvíst að viðræðum um aðild Íslands að Evrópusambandinu verði lokið með samningi sem borinn verður undir þjóðina. Áður en af því getur orðið kann sú staða að koma upp að Alþingi endurmeti aðildar­umsóknina. Þetta er mat Árna Þórs Sigurðssonar, starfandi formanns þingflokks Vinstri hreyfingarinnar – græns framboðs.

„Það getur vel verið að þær aðstæður komi upp að það þurfi að ræða það í þinginu hvort við eigum að halda þessu ferli áfram. Að við þurfum á einhverjum tímapunkti að meta okkar hagsmuni upp á nýtt í ljósi þeirrar þróunar sem verður í viðræðunum. En sá tímapunktur er ekki kominn,“ segir Árni Þór.

Fjallað var ítarlega um Evrópusambandsmálin á fundi þingflokks VG á mánudag. Embættis- og samningamenn á sviði sjávarútvegs- og landbúnaðar sátu fundinn og svöruðu spurningum þingmanna. Tilgangurinn var að þingmenn gætu áttað sig á stöðu og þróun viðræðnanna.

Svokölluð rýnivinna stendur yfir en í henni felst að bera saman íslensk lög og löggjöf Evrópusambandsins, sjá hvar samhljómur er og hvað þyrfti að semja um í eiginlegum samningaviðræðum.

Árni Þór segir ástæðulaust að leiða hugann að viðræðuslitum fyrr en samningaviðræðurnar eru hafnar. Þá fyrst liggi fyrir hvort hagsmunum Íslands sé þannig fyrir komið að meta beri málið upp á nýtt. Það kunni að verða gert á vettvangi Alþingis.

Fundurinn á mánudag var liður í að sætta ágreining innan þingflokksins. Það á að gera með málefnalegri umræðu um helstu álitamál. Árni Þór segir að á fundinum hafi fólk færst nær í þeim ásetningi sínum að vinna saman. Góður tónn hafi verið í fólki og skoðanaskipti málefnaleg. - bþs