Stjórnarformaður Orkuveitunnar: Ráðningaferlið gagnsætt og faglegt

„Leitast hefur verið að gera þetta ferli eins gagnsætt og faglegt og mögulegt er," segir Haraldur Flosi Tryggvason, stjórnarformaður Orkuveitu Reykjavíkur. Stjórn fyrirtækisins ákvað í dag að ráða Bjarna Bjarnason, framkvæmdastjóra hjá Landsvirkjun, sem næsta forstjóra Orkuveitunnar. Tilkynnt verður formlega um ráðninguna á starfsmannafundi í hádeginu á morgun.

Kjartan Magnússon, borgarfulltrúi Sjálfstæðisflokksins, vill að ráðningu Bjarna verði frestað, en Kjartan gerir alvarlegar athugasemdir við ráðningaferlið. Hann segir m.a. að stjórnarmenn hafi ekki fengið að taka fullan þátt í ferlinu. Þess í stað hafi tveir einstaklingar utan stjórnarinnar annast að mestu leyti val umsækjenda án þess að hafa til þess umboð stjórnarinnar. Um yfirlýsingar Kjartans segir Haraldur: „Ég er svolítið hissa á þeim."

Haraldur bendir á að allt frá því að forstjórastaðan hafi verið auglýst um miðjan desember hafi upplýsingar um ráðningaferlið legið fyrir. Listi yfir umsækjendur og allar umsóknir hafi verið aðgengilegar fyrir stjórnarmenn Orkuveitunnar. Stjórnarmenn hafi þannig verið vel upplýstir um gang mála.

Ennfremur segir Haraldur að af þeim 60 sem sóttu um stöðuna hafi tíu verið boðaðir í stöðluð viðtöl. Í framhaldinu hafi 4-5 umsækjendur verið boðaðir í viðamikil rök- og persónuleikapróf. Af því loknu hafi þrír verið metnir hæfastir og að einn þeirra hafi dregið umsókn sína til baka. Haraldur segir að fyrir vikið hafi valið staðið á milli tveggja umsækjenda sem metnir hafi verið jafnhæfir.

Haraldur vill sem minnst segja um gagnrýni Kjartans Magnússonar. „Breytingar eru oft sársaukafullar og misjafnt hvernig einstaklingar bregðast við þeim. Við erum að fara nýja leið með þessa hluti og það er mín bjargfasta trú að þessi leið sé fagleg og gagnleg."