Brýnt að draga nemendur í iðngreinar

Vinna þarf frekar að því að draga nemendur inn í námsgreinar sem ekki hafa verið vel sóttar, svo sem iðngreinar. Þetta segir menntamálaráðherra en á sama tíma og um 80% ungs fólks á atvinnuleysisskrá er aðeins með grunnskólapróf vantar fólk inn í iðngreinar.

Framúrskarandi nýsveinar svo sem málarar, dúklagingarmenn, skrúðgarðyrkjumenn, rafeindavirkjar, rafvirkjar, rennismiðir, hársnyrtisveinar og fleiri iðnarðar- og tæknimenn voru heiðraðir við hátíðlega athöfn í ráðhúsinu um helgina.

Við athöfnina var rætt um að nauðsynlegt væri að kynna iðngreinar betur og gildi þeirra. Oft virtist sem að bóknámi væri gert hærra undir höfði þótt öllum hlyti að vera ljóst að nám við iðngreinar ætti síst að vera auðveldara.

Nú eru um 13 þúsund manns atvinnulaus. Stór hluti þeirra eru ungt fólk og um áttatíu prósent þessara ungmenna eru aðeins með grunnskólapróf.

Nýlega fólu þingmenn allra flokka forseætisráðherra það verkefni að stýra mótun aðgerðaráætlunar til að vinna bug á atvinnuleysi ungs fólks. Til að bæta úr stöðunni og virkja þetta unga fólk er ætlunin að efla iðn- og tænimenntun en margar greinar skortir sárlega mannskap og verða jafnvel að leita til útlanda eftir starfsfólki. Þetta þykir einkennileg staðreynd á meðan fjöldi ungs fólks er heima atvinnulaust og sér engin tækifæri.

Katrín Jakobsdóttir menntamálaráðherra segir að oft á tíðum geri fólk sér ekki grein fyrir þeim möguleikum sem felast í iðnnámi og því sé áskókn stundum mjög dræm þótt tækifærin séu fyrir hendi.

„Þau verkefni sem við höfum farið í hafa einmitt miðað að því að draga fólk inn í nám sem af einhverjum orsökum hefur ekki hefur verið vel sótt áður. Við sjáum alveg frábæran árangur úr þeim verkefnum. Góðan árangur nemenda sem ýmist halda áfram í námi eða jafnvel fá vinnu við þær greinar, þannig ég held að við gætum gert mikið meira af slíku," segir Katrín.