Hafnar samræmdri stefnu í samningum

Einstök félög innan Starfsgreinasambands Íslands gætu dregið samningsumboð sitt til baka og farið eigin leiðir í kjarasamningum samkvæmt heimildum Fréttablaðsins. Ástæðan er meðal annars samræmd launastefna sem talað hefur verið fyrir sem forsendu stöðugleika á vinnumarkaði.

Málið ræðst að öllum líkindum á fundi Starfsgreinasambandsins í dag þar sem tekin verður ákvörðun um næstu skref.

Vilhjálmur Birgisson, formaður Verkalýðsfélags Akraness, segir samræmda launastefnu ekki þjóna hagsmunum sinna félagsmanna.

„Ef Starfsgreinasambandið ákveður á fundinum að fara út í samræmda launastefnu þar sem allir íslenskir launþegar verða settir upp í sama sporvagninn og eiga að fá sömu hækkanir, þá mun ég leggja til við saminganefnd félagsins að samningsumboðið verði dregið til baka og við semjum sjálf við Samtök atvinnulífsins um kaup og kjör félagsmanna."

Vilhjálmur bætir því við að það sé ekki hægt að leggja allar atvinnugreinar að jöfnu því að á meðan margir séu vissulega í sárum standi fyrirtæki í útflutningi sig vel, meðal annars vegna veikingu krónunnar.

„Þess vegna sé ég enga ástæðu fyrir að gefa þessum fyrirtækjum einhvern afslátt í kjarasamningunum. Þau hafa fulla burði til að skila sínum ávinningi til starfsmanna og það er okkar krafa að það verði gert. Við munum fylgja því eftir af fullum þunga."

Heimildarmaður Fréttablaðsins innan verkalýðshreyfingarinnar, sem vildi ekki láta nafns síns getið, segir að staðan sé þannig að nokkur félög innan sambandsins gætu sagt sig frá viðræðunum, en það velti á útkomu fundarins í dag.

Björn Snæbjörnsson, formaður samninganefndar Starfsgreinasambandsins, segist ekki hafa heyrt af þessum hugmyndum einstakra félaga, en sagði málin myndu skýrast á fundinum í dag.

Sverrir Már Albertsson, framkvæmdastjóri AFLs á Austurlandi segir að engin ólga sé innan Starfsgreinasambandsins út af samræmdri launastefnu.

„Ég veit ekki um neitt félag sem hefur hótað að draga samningsumboð sitt til baka út af því."

Hann sagði þó að ef til þess kæmi að AFL myndi taka upp viðræður við atvinnurekendur yrði það í mjög nánu samstarfi við Starfsgreinasambandið.thorgils@frettabladid.is